فوائد لينكد ان LinkedIn benefits

فوائد لينكد ان LinkedIn benefits.

 ازاى ممكن تستفيد من لينكد اى؟
في كل مرة باتكلم مع حد لسة في الكلية أو لسة جديد في المجال وبتيجي سيرة الشغل، دايمًا باتكلم عن لينكدان وباحاول أؤكد على أهميته.

ليه لينكدان مهم؟
وقت كتابة البوست ده، لينكدان عليه حوالي 660 مليون مستخدم من كل أنحاء العالم، فيه أكتر من 20 مليون فرصة توظيف على الموقع في أكتر من 30 مليون شركة، وحوالي 80% من في العالم بيستخدموا لينكدان في التوظيف.

في البوست ده هاقولك شوية خطوات تعملها عشان تظهر بشكل أفضل على لينكدان، الحاجات دي أنا اتعلمتها من خلال مقالات كتير بتتكلم عن لينكدان، أو بالتجربة بشكل شخصي على مدار السنين اللي فاتت.

أنا ليه باكتب البوست ده؟
1. فيه شباب كتير في الجامعة مش مقدرين قيمة لينكدان، أو شايفين إنه حاجة نبدأ نبصلها بعد ما نتخرج، ولما بيتخرج بيكتشف إنه محتاج يقضي وقت طويل في إنه يبني network مناسبة على الموقع تخليها يقدر يستفيد منه. المنطقي أكتر إنك تبدأ تبني الـnetwork دي وانت في الكلية عشان تقدر تستفيد منها لما تبدأ تدور على شغل.
2. قابلت كذا حد بيبقى عنده الخبرة إنه يلاقي فرص مناسبة برة مصر، ويقدر يعمل ده فعلًا من خلال لينكدان، لكن لإنه مش قادر يعرض خبرة خبرته بشكل يجذب الـrecruiters، مش عارف يوصل للفرص دي.
3. لو انت حتى مش محتاج تستخدم لينكدان في إنك تلاقي وظيفة، هو في النهاية المكان المثالي اللي تقدر تعرف من خلاله التاريخ العلمي والمهني لأي حد، وده هيفيدك بشكل كبير لو كنت بتتعامل مع customers أو بتحتاج تحضّر لأي meetings بشكل متكرر.

ايه هي الخطوات اللي ممكن أعملها عشان أظهر بشكل مناسب على لينكدان؟
1. لازم تخلى الـProfile photo صورة شخصية ليك مبينة وشك، ولازم تكون formal إلى حد كبير. أنا عارف إن دي ممكن تبان حاجة trivial ومش محتاجين نقولها أصلًا، بس في الواقع فيه ناس كتير إما مش بتحط صورتها خالص، أو بتحط صورة ممكن تكون مناسبة لفيسبوك مثلًا مش لمكان professional، أو الأسوأ من كدة إن حد يحط صورته مع حد تاني. صورة الباسبور مثلًا صورة مناسبة للينكدان.

2. العنوان الرئيسي اللي تحت إسمك لازم يكون مُعبر عن وظيفتك الحالية أو الوظيفة اللي انت بتسعى ليها في الوقت الحالي.
- لو انت لسة في الكلية، اكتب انت طالب في كلية ايه، ومهتم بتخصص ايه تحديدًا.
- لو انت بتشتغل بالفعل، اكتب انت بتشتغل ايه، ومتخصص في ايه تحديدًا.
- لو انت بتسعى لتغيير وظيفتك، اكتب انت بتشتغل ايه حاليًا، وانت مهتم تنقل لأي تخصص.

3. ضيف للأكونت بتاعك الـIndustry اللي انت شغال فيها لإن ده أحد الحاجات اللي الناس بتستخدمها في الـSearch.

4. فى الـContacts حط الـPersonal E-mail بتاعك، وحط رقم موبايلك كمان عشان أى حد يقدر يوصلك بسهولة.

5. بالنسبة للـSummery، لازم تهتم بيه جدًا لإنه من أهم الحاجات اللى بتجذب أى حد بيدور على موظف، لازم تكتب فيه نبذة مُختصرة عنك، ويكون فيها Keywords عشان الناس توصلك بسهولة لما تعمل Search عنها، وضيف الـCV بتاعك في الـSummery ، وكمان اكتب الـContacts بتاعتك عشان تسهل على الناس الوصول ليك.

6. بالنسبة للـExperience، بتكتب هنا كل التفاصيل اللى تخص خبرتك فى المجال بتاعك، وكمان الشركات اللى اشتغلت فيها قبل كدة، ونبذة عن وظيفتك فى كل شركة. اكتب تفاصيل عشان اللي بيقرأ يفهم ويقدر يكون وجهة نظر صح، انت هنا مش محتاج تختصر حاجة زي ما بتكتب في الـCV مثلًا. حاول يكون مفيش gaps في تاريخك المهني، حتى لو كنت في وقت في الجيش، اكتب ده بشكل مختصر جدًا عشان توضح للي بيشوف الأكونت انت ليه مكنتش بتشتغل في الوقت ده.

7. بالنسبة للـConnections، أنا بارشح إنك تقسم الـConnections requests لـ3 أجزاء:
- الجزء الأول يكون فيه ناس بيشتغلوا بشكل مباشر في مجالك وده خليه تقريبًا 50% من الـConnections.
- الجزء التاني يكون فيه موظفي الـHR في الشركات اللي في الـindustry، وده خليه 40% من الـnetwork بتاعتك.
- أما الجزء التالت هيكون فيه ناس مش بيشتغلوا نفس شغلك بشكل مباشر، لكن شغالين في مجالات تانية في نفس الـindustry، ودول بتضيفهم عشان تكبر شبكة علاقاتك في الـindustry اللي انت مهتم بيها، والجزء ده بيكون الـ10% الباقيين.

8. ممكن تاخد الخطوات دي عشان تكبر الـnetwork بتاعتك بالتدريج:
- تقدر تضيف الناس اللي درست في نفس الكلية اللي انت درست فيها عن طريق Tab في الموقع اسمه Find Alumni بيطلعلك كل الناس اللي درسوا معاك.
- انشر الأكونت بتاعك علي أكونت فيسبوك وتويتر وأي شبكة تانية انت مشترك فيها.
- الموقع كمان بيوفرلك امكانية انك تضيف الناس اللي عندك على الميل.
- حاول دايمًا تعمل search عن الناس اللي في نفس مجالك وضيفهم، خصوصًا الناس اللي في الشركات اللي انت بتستهدفها.

9. فيه جزء في الأكونت عن الـSkills بتاعتك، أو المهارات اللي انت شايفها في نفسك. خلي الجزء ده updated دايمًا لإن ده الوظائف اللي بتظهرلك بتعتمد بشكل جزئي على الـskills اللي انت حاططها في الأكونت.

10. خليك محدد وانت بتضيف درجتك العلمية والمكان اللي اتعلمت فيه. ولو تقديرك مش أحسن حاجة مش لازم تحطه. لو انت بالفعل عندك شوية خبرة، محدش هيبص انت متخرج منين غالبًا.

11. فيه جزء في الأكونت اسمه Recommendations، تقدر دايمًا تطلب من زمايلك ومديرينك اللي اشتغلت معاهم قبل كدة يعملولك Recommend، ده هيزود ثقة الناس في الأكونت بتاعك.

12. أخيرًا، لينكدان في النهاية مكان لعرض خبرتك، مش أداة سحرية. لو انت معندكش حاجة تعرضها للناس غالبًا مش هتقدر توصل لشيء من خلال الموقع. الأهم دايمًا من لينكدان والـCV وخلافه هو خبرتك الشخصية سواء علميًا أو مهنيًا.

Mohamed Ameen