هم ازاى ضحكوا علينا ؟؟!!

هم ازاى ضحكوا علينا ؟؟!!


 بقلم : محمود عبد الحفيظ


 هو احنا ازاى غمينا عنينا ؟ ...هو احنا ازاى اضحك علينا ؟ ... هو احنا ازاى صدقنا الكدبة ؟ ...هو احنا ازاى بلعنا الطعم ؟


شخصنة الثورة هى السبب .. والانفلات و حزب الكنب 


ضاعت مننا القضية و رجعونا الف سنة 

نفذولنا مخطط رهيب فى قتل الثورة و فى الترهيب 


يا فلولنا كفايا سيبونا فى حالنا موتونا و جبتوا أجلنا ..


باختصار يا كرام بعد ما خلصنا الكلام و معادش فاضل لينا وحدة و اتفرقنا و فرق تسد ...


اللى حصل لا ينحكى و لا ينكتب على الورق ... اللى حصل ده كان نزيف لشعب عاش عمره كفيف ... و لما فتح و شاف بعينه من الفرحة جاله  شلل !!!


يا مصر قومى و فوقى و شوفى مين اللى خانك و مين معاكى .. مين اللى قتلك علشان فلوسك و مين اللى مات فدا ترابك ...


يا مصر قومى كفاية خوف ... يامصر قومى تعالى نشوف فيه ايه جرالك و ايه حصل ...


لما نادينا و قولنا ثورة و اتحدنا و قولنانله بره ... خاف النظام و قاوم و موت شباب حر احلامه حرة ..


و لما انتصرنا و فازت الثورة طلعوا الفلول من جرة لبرة  ... نفخوا فى نار الفتنة المرة و قالوا هى مساوىء الثورة ..


شخصنوا ثورة شعب فى نخبة ... سوأوا سمعتهم بكلام 
... ايشى ليبرالية على ماسونية و علمانية و اسلامية ... و فرقوا بين الناس بالفتنة ..


و قفوا و ضحكوا و قالوا دول خونة و عاوزين مصر يخربوا فيها ...


نسونا الناس اللى اندفعت ... و حياة الشهدا اللى ادفعت ... و الميادين المليونية

علشان نبقى احنا اللى ضحية ...  قالوا على الثورة ثورة خونة .. و معمولة بفلوس حرامية


لا يا فلولنا متحكولناش ... الثورة مراحتش بلاش 


الثورة مش واحد خاين ... او تمويل جاى لمجموعة


الثورة كانت ملايين ... خرجوا يطالبوا بحقوق مشروعة


الثورة كانت عواجيز ... و شباب واعى دماغهم صاحية


الثورة كانت ستات ... و اطفال شموا هوا الحرية 


الثورة كانت ثورة شعب ... ملهاش قائد ولا ليها نخبة


النخبة طلعت بعد الثورة ... و ارائهم محسوبة عليهم


كفيانا تشويه و مغالطة ... و كفاية تزييف فى حقايق


اشمعنا محاسبتوش مبارك ... على رجالته الحرامية


يوسف غالى و حسين سالم ... و المليارات المخفية


قولتولنا انه كان مغيب ... و ميعرفش حاجة عن الشعب


فضيحتنا كانت بجلاجل ... و نافسنا على الفقر بقلب


امريكا فرضت معونتها و اوروبا ساعدت فى خيبتنا وشبابنا ماتوا بحصرتهم و سيرتنا على كل لسان


و لما جه يومك يا ظالم قتلت شهدا من غير ذنب


و كملهلنا حبيبك العادلى ... وعاقبنا بانفلات الأمن

و جم فلولك يرتبولك مليون قصة انك عيان 


و انك قلبك مش مستحمل و انك طيب اوى و غلبان


فوقوا يا عالم فوقوا يا هوووه


الثورة كانت بتطهر الحرامية و الهليبة


صدقوا عينكوا و سدوا ودانكوا شوفوا مين عايش بالملايين


شوفوا مين فينا اللى معاكوا و مين فينا المضللين


شوفوا مين فينا المتمول و مين عايش وسط الجاعنين


بص لنفسك انت و هو و اعرف حقك فين مع مين


بص لمصر و فتح عينك و ارفع راسك غصبن عنهم


اوعى تتطاطى و اياك تسكت على ظلم شوفته بعنيك


ارفع صوتك قول و انا جنبك ... و انصر مصر الله يخليك

توقيع صعيدى من مصر

سفارة بلا عنوان

 بقلم : محمود عبد الحفيظ

ماذا يعنى أن لاسرائيل سفارة فى الدول العربية؟
معناها ببساطة ان العرب يعترفون بأن الكيان الصهيونى دولة و يرفعون اعلامها و يحمون سفاراتها بل و يعترفون رسميا بحقهم فى الاستيطان الذي يمارسونه فى ارض فلسطين الحبيبة و يوافقون عليه و بدلا من أن يحرروا القدس هم بذلك يساعدون الصهاينة فى مخططهم اللئيم للتوسع الصهيونى و لهدم المسجد الاقصى !!!

بالطبع فاذا كنت تعتبر أن اسرائيل عدو لك و تعرف جيدا و تعترف بانها قوة صهيونية احتلالية استباحت دم العرب و نهبتهم وطنهم و استوطنت كالسرطان فى اراضيهم فكيف تعترف بهم كدولة و تنشىء لهم سفارة على ارضك الا ان كنت تعينهم على فسقهم هذا ؟!!


سنقول ان هذا كان يحدث قبل ثورات الربيع العربى و قبل ان تنتفض الشعوب و تفيق و تطيح بحكامها الطغاة الذين عملوا تحت اقدام اسرائيل و امريكا من اجل مجد زائف و سلطة زالت بسهولة لم يتوقعها أحد لأن أوهن البيوت بيت العنكبوت .. و لان ملكهم قد بنى على باطل فقد زال بسهولة و اذا كان اساسه متين لما تأثر بالعاصفة عندما هبت ...

كذلك هى اسرائيل قد بنيت على باطل فلا تستبعد دمارها و سقوطها فهو عند الله هين و سهل و لكن يجب أن نتحرك نحن أولا حتى ينصرنا الله و يجب أن نحافظ على الارادة التى اطاحت بطغاة العرب ...


تذكروا معى حرب اسرائيل مع حزب الله و كيف خسرت اسرائيل و لم تستطع رد فئة صغيرة رفعت اسم الله و جعلته شعارها فاعزهم و نصرهم و حتى ان كنا لا نتفق معهم فى مذهبهم فهم فى النهاية مسلمون موحدون و هم أقرب الينا من اليهود ... 

و اعتقد ان الصراع الخفى بين السنة و الشيعة هو من فعل الصهاينة لعنهم الله فهم يشعلون الفتنة بين السنة و الشيعة و بين المسلمين و الاقباط و بين كل الفئات العربية خشية ان يتحدوا فيقوموا ووقتها ستكون نهاية بنى صهيون للابد ان شاء الله ... 


لماذا لا نستغل الربيع العربى و الثورات التى اطاحت بطغاة العرب لنتحد و لنكن قوة واحدة .. لماذا لا نبدا حتى بالاقتصاد و التجارة و الاسواق العربية المشتركة و العملة العربية الموحدة ؟؟

لماذا لا نجعلها أمة واحدة من جديد حتى ينصرنا الله بوحدتنا و تذكروا ان صلاح الدين لم يحرر القدس الا بعد ان وحد العرب  و جمعهم تحت لواء واحد و راية واحدة بكل طوائفهم سواء سنة او شيعة او اقباط تجمعوا كلهم و وقتها كتب الله النصر للعرب و استطاعوا تحرير القدس ووقفوا ضد جيوش الصليبيين التى توافدت من كل دول اوروبا و انتصروا عليهم و ردوهم الى ديارهم خائبين ...


هل تظن أن الامر مستحيل و أن ايام صلاح الدين كانت الاوضاع اسهل من الان؟؟ 
اقول لك ابدا فوقتها ايضا كان الاوروبيين متفوقين عسكريا و كانوا يمتلكون معدات حربية لا يمتلكها العرب و تذكر ايضا ان الحرب وقتها كانت فى الجبال وسط الحر الشديد و مع ذلك ظل صلاح الدين و جيشه كالاسود حتى استطاعوا رد العدوان فقط بوحدتهم و عندما تفرقنا من بعده انهزمنا مرة اخرى ...


أعلم جيدا ان هذا الكلام قد سمعناه مئات المرات و لكنى الأن و بعد سقوط طاغية ليبيا و ان شاء الله تقترب ايضا نهاية طاغية سوريا و اليمن اصبح الامل أكبر و عاد الحماس ليملأنى مرة أخرى و انا أكتب مقالى هذا و كلى تفاؤل بأن الشعوب التى كانت تقرأ المقالات بالأمس بدون اهتمام و لا مبالاة ملقين اللوم على حكامهم قد تغيروا و يقرأون اليوم باهتمام و حماس موقنين ان التغيير سيأتى منهم و اننا قريبا ان شاء الله سنسقط اعلام الكيان الصهيونى من على سفاراتهم و سترفرف اعلام فلسطين الحبيبة و سنحتفل فى كل الشوارع العربية بالتحرير و بجلاء الظلم و الطغيان ...


اللهم احينا لنرى هذه اللحظة اللهم اجعلها قريبة و كمانزعت ملك الطغاة بكلمة "كن" فانزع ملك الصهاينة بفعل "يكون" ...


و حتى ان نشهد هذه اللحظة يجب علينا جميعا كشعوب عدم الاعتراف بالكيان الصهيونى و الاعتراف فقط بفلسطين و لننشىء لها سفارة فى قلوبنا نحميها و نرفع اعلامها و نفديها بدمانا و أرواحنا حتى و ان كانت سفارة فلسطين  ... سفارة بلا عنوان ...

توقيع : صعيدى من مصر

ماذا يحدث لعملاء مصر للطيران فرع طلعت حرب؟؟!!

بقلم : محمود عبد الحفيظ

ماذا يحدث لعملاء مصر للطيران فرع طلعت حرب؟؟!!


بعد اجازتى السنوية التى ابتعدت فيها عن عملى و انقطعت حتى عن الكتابة فى المدونة ...
و فى اخر أيام اجازتى التى قضيتها فى القاهرة كنت أريد تعديل موعد سفرى عبر خطوط مصر للطيران فتأهبت للذهاب الى فرع الشركة فى شارع طلعت حرب و الذى يبعد امتار قليلة عن ميدان التحرير  ... 

 

عند وصولى للشركة وجدت شخص يقف على باب الشركة ...



قاللى : أيوة يا استاذ انت عاوز تحجز أو تغير حجز .. 
قلت : ايوة
قاللى : من المكتب التانى مش من هنا ...
قلت : فين المكتب التانى ده؟

شاورلى عليه و قاللى المدخل اللى على اليمين ده ...
رحت مكان ما قاللى و لقيت مدخل عليه يافطة مصر للطيران ... كان المكان عبارة عن شقة فى الدور الارضى معمولة مكتب ..
دخلت لقيت ناس كتير قاعدين جنب بعض بيشتغلوا و كان فيه ناس كتير برضو بيحجزوا ...


رحت لواحدة من اللى بيشتغلوا قلتلها لو سمحتى عاوزاغير الحجز بتاعى عاوز اسافر بكرة ..

اخدت التذكرة و قعدت تشتغل على الكمبيوتر و قالتلى فيه بكرة الساعة 2 الظهر قلتلها ماشى ..
قالتلى رسوم التغيير 300 جنيه ادفع عند الاستاذ ..
رحت دفعتله الفلوس قاللى خلاص .. قلتله مفيش وصل قاللى لا روح استلم التذكرة على طول ..

طبعتلى البنت التذكرة و كتبتلى عليها التعليمات و انى لازم اكون فى المطار قبل الميعاد بفترة و الى اخره ..
قلتلها طيب تذكرتى القديمة قالتلى لا دى هنحتفظ بيها ...

اخدت منها التذكرة اللى طبعتهالى و محطوطة فى ظرف مصر للطيران و لما خرجت شكيت فى الموضوع فرحت مكتب مصر للطيران اللى الراجل كان واقف قدامه و هو المكتب الرئيسى بتاعهم و لقيت الراجل واقف هناك على الباب برضو بس مش لوحده كان فيه 2 تانى و كلهم بيشاوروا لاى حد يجى على المكتب التانى .. المهم دخلت المكتب و سألت واحد هو انتوا ليكم فرع تانى هناك ؟؟ قاللى لا


قلتله طيب انا الراجل اللى على الباب وقفنى وودانى المكتب اللى هناك رد علية و قاللى و انت بتسمع كلامه ليه؟؟

قلتله طيب انا عاوز اتأكد من الحجز ده .. قعدت قدام موظفة و شافت التذكرة قالتلى لا انت ميعادك زى ما هو متغيرش لبكرة ولا حاجة و قالتلى اصلا معندناش حجز بكرة مفيش غير انهارده ... المهم غيرت الحجز و اتكلف 180 جنيه بس ..

  قلتلهم فى مصر للطيران انتوا ازاى سايبين الناس دول كده بياخدوا كل اللى يجيلكم حتى السياح الاجانب قالولى والله احنا بلغنا الجيش و الشرطة و مفيش فايدة ...


المهم خرجت و رجعت للمكتب بتاع النصابين تانى و مسكت الموبايل على ودنى كأنى بتكلم و دخلت على الولد اللى بيستلم الفلوس هناك قلتله انا معايا لواء شرطة على التليفون انا عاوز فلوسى يا حرامية ...

وقتها كان فيه ناس كتير فى المكتب بيحجزوا حوالى 20 واحد  تقريبا و كان منهم 3 اجانب اوربيين كانت البنت بتكلمهم انجليزى ..

المهم هم على طول حاولوا يهدوا الموقف معايا علشان محدش ياخد باله بس انا كنت بحاول أعلى صوتى علشان الناس اللى بيحجزوا ياخدوا بالهم ..

قالولى طيب هنديك حضرتك فلوسك بس اتفضل ادخل جوة و كانوا بيفتحولى اوضة ادخلها انا مرضيتش ادخل لانى معرفش فيه ايه جوة قلتلهم انا هاخد فلوسى هنا ...

المهم على طول علشان الناس مياخدوش بالهم قالولى دفعت كام قلتلهم 300 جنيه .. 
راحوا دفعوهملى و اتلم علية حوالى 5 او 6 تقريبا بلطجية خرجونى برة و خطفوا منى التذكرة اللى كانوا طابعينهالى و قالولى خلاص اخدت فلوسك امشى ....


انا خرجت بس كنت مضايق جدا على الناس اللى بتحجز عندهم و خصوصا ان فيه اجانب و بعدين دول بينصبوا باسم مصر للطيران يعنى سمعه زى الزفت لمصر ...

و بعدين انا كنت بغير حجز بس ب300 جنيه تخيل اللى بيحجزوا تذاكر دولية 4000 او 5000 جنيه يعنى مبالغ كبيرة جدا و مفيش حجز اصلا بيدهولهم دول بيطبعوا ورق بس..

المهم رحت على الأمن المركزى اللى عند الميدان و شفت هناك ظابط قلتله قاللى احنا هنا لتأمين الميدان بس

مشيت لقيت اتنين ضباط شرطة فى شارع تانى قلتلهم قالولى روح شرطة السياحة بلغ عنهم و بعدين احمد ربنا انك اخدت فلوسك ...


المشكلة فعلا انى مكانش عندى وقت لانى كنت غيرت حجزى و مسافر فى نفس اليوم فمقدرتش اروح ابلغ قابلت واحد من الشرطة تانى قريب من مكان المكتب ده قلتله قاللى فيه ناس كتير بلغوا عنهم و مفيش فايدة !! و احمد ربنا انك اخدت فلوسك ...

سؤالى الوحيد دلوقتى هل تأمين ميدان التحرير بألاف عساكر الأمن المركزى اهم من تأمين عملاء مصر للطيران اللى اغلبهم سياح اجانب و يسيبوهم يتنصب عليهم عينى عينك كده دون اى تدخل من الشرطة ؟؟


كل ما كتبت حقيقة و انا شاهد عليها و أتحمل مسؤوليتها ولا اعلم ان كان لموظفى مصر للطيران يد فى مساندة هؤلاء أم لا .... هل هذه هى مصر التى كنا نتمنى ان نراها بعد الثورة؟؟ 

كلامى هذا اعتبره بلاغ للنائب العام من فضلكم اغيثونا .. هو ده الفساد اللى بنتمنى فعلا اننا نغيره وهو ده دور الشرطة الحقيقى اللى عاوزين نشوفه و هم دول اللى نفسنا نشوف الأمن المركزى بيتعامل معاهم بجد ....

توقيع : محمود عبد الحفيظ

صعيدى من مصر