WNR

WNR
World News Reader

الثلاثاء، 14 يونيو 2011

تهييسات ثورية .. افلام مصرى ام الاجنبى

بقلم : محمود عبد الحفيظ


-  كنت بتكلم مع واحد و كان زعلان و بيقوللى انتو بتتهموا الشرطة بالباطل فافتكرت حاجة كنت قلتها لجماعة اصحابى زمان...
ان من المشاهد القليلة التى رأيتها فى الافلام الاجنبية و تمنيت رؤيتها فى مصر هو مشهد الاعتقال تخيلوا ؟!! 
الظابط لما بيكون عاوز يعتقل حد هناك بيحط فى ايده الكلبش عادى و بعدين بيسمعه بكل أدب مقالة كاملة من حقوقه مع تذكيره ان من حقه الا يتكلم الا فى وجود محامى و يركبه السيارة و يحط ايده على راسه علشان ميتخبطش .. 
مشهد مماثل شفته لشخص مصرى يعتقل من ضباط شرطة مصريين  تقريبا كده على ما اتذكر من ساعة ما مسكوه لغاية ما ركب البوكس اللى قدرت اعده 30 شلوت على 50 قلم ...
افلام مصرى .. ام الاجنبى

و مع ذلك فان ثورة الغضب اللى كل الشعب مستنى يشوفها بجد و اللى الشعب كله بيدعوا لحشد مليونياتها هى ثورة غضب شرفاء ضباط الشرطة على ان يكون غضبهم موجه ضد البلطجية و لكننا للاسف ما زلنا نشاهد البلطجية يسعون فسادا فى ارض مصر و شرفاء الشرطة لاحول لهم ولا قوة فهل تحتاج الشرطة الى خالد سعيد فى زى شرطى يقتل على يد بلطجية حتى يكون فتيلا لثورة تطهير مصر من فساد البلطجية؟؟ 
حقيقة لا نتمنى ذلك و لا نتمنى ان يمس اى مصرى بأذى سواء كان شرطى او مدنى و نتمنى ان ينتفض شرفاء الشرطة قبل ان نرى الف خالد سعيد مدنيين او شرطيين يقتلوا او يصابوا على ايدى البلطجية...



- من الحاجات اللذيذة اللى شفتها و موتتنى من الضحك هو الجاسوس ابن الجاسوس الى اتمسك فى مصر امبارح ...
لما قرأت كل المواضيع عنه حسيت انى كل اللى اتعلمته من مسلسل رأفت الهجان ده ملوش لازمة .. جاسوس جاى مصر متصور فى ميدان التحرير و متصور جنب الدبابة و فى وسط الشباب و كان ناقص يتصور فى الاجتماع المغلق بتاع المجلس العسكرى و حاطط كل الصور والحاجات بتاعته على اللابتوب و على سيديهات و على فلاشة
مع الاحتفاظ طبعا بصوره فى اسرائيل بلبس الجيش الاسرائيلى و يمكن يكون حاططها خلفية للاب بتاعه كمان و اكيد طبعا الملفات و الصور دى كلها  كانت محطوطة فى فولدر بأيقونة حمرا على الديسكتوب مكتوب عليه سرى للغاية ممنوع الفتح علشان لما يتمسك و الناس يشوفو الايقونة فى وشهم ميفتحوهاش
و طبعا بمحض الصدفة يكون بروفايله على الفيس بوك عليه صورته بالحجم الكبير و هو قاعد فى مسجد و بيقول للناس انه بيدرس فى الازهر و اصحابه على الفيس كلهم يهود حاطين اعلام اسرائيل علشان لو حد دخل ميشكش خالص يمكن بيهدى اليهود للاسلام مثلا .. أو على اساس ان فهمه على قده فى الفيس بوك فمعرفش يخفى اصحابه اليهود..

المثير بقى انه قبل ما ياخد اول قلم اعترف بكل حاجة و الاعترافات اتنشرت فى الاعلام للناس كلها فى يوم واحد على اساس انها مش قضية امن قومى و لا التحقيقات المفروض تكون سرية ولا حاجة!!!
تفتكروا يكون يوسف شعبان كان محبكها اوى مع محمود عبد العزيز فى المسلسل لما كان بيخليه يحرق اى ورقة و لما كان بيدربه انه لو اتمسك يتصرف ازاى و يعمل ايه على جهاز كشف الكذب ؟؟ 
ولا اللى شفناه مع الجاسوس و المستندات و الصور بتاعت القضية اللى اتنشرت فى دقايق ده فيلم بيبين سذاجة الموساد الاسرائيلى فى 2011 و ان يوسف شعبان اذكى منهم؟؟ 
ولا الفيلم ده دعاية للامن الوطنى على اساس ان هو اللى قفش الجاسوس؟؟
افلام مصرى ... ام الاجنبى




- بعد مشاهدة بعض الفيديوهات على الانترنت لطلبة كليات الطب يصورون فيها المستشفيات الحكومية و الحياة الغير آدمية فيها و تصويرهم كيفية التعامل مع المرضى و وضعهم فى سراير مشتركة تصل الى ثلاثة مرضى على سرير واحد
بخلاف الحشرات و القطط و الكلاب التى شوهدت داخل اقسام العلاج الخ... 
فهمت فعلا وجهة نظر الاطباء المحترمين الذين اعلنوا الاضراب مطالبة بتحسين احوال علاج المواطنين قبل تحسين احوالهم و عزل القيادات الفاسدة من وزارة الصحة و التحقيق معهم ..

و هنا استخدمت هذه القيادات فيلم الاستقرار الشهير لحمايتهم من المصير الاسود الذى ينتظرهم و بالطبع كان الفيلم بطولة الناس الغلابة اللى حالهم واقف و لا ننسى طبعا ان عجلة الانتاج فست و محتاجين عجلاتى ... 
و لما الناس بدأت تهاجم الاطباء المحترمين و اتهموا اضرابهم بان وراءه مطلب فئوى دنىء ، صرخت هذه القيادات بأعلى صوتها وقالت ... "ايوة كده يا وديع" ..

افلام مصرى ... ام الاجنبى


توقيع : صعيدى من مصر