WNR

WNR
World News Reader

الأحد، 3 أبريل 2011

أسف حضرتك بلطجى

 بقلم : محمود عبد الحفيظ

 الناس كلهم انهاردة ملهمش سيرة طبعا غير المهزلة اللى حصلت امبارح فى استاد القاهرة و اللى طبعا كلنا تألمنا منها جدا لكذا سبب أولهم و هو أهم سبب ان يحصل كده فى لاعبين تونس اللى طول الفترة اللى فاتت لم يبخلوا على مصر و المصريين بشىء و بأنهم كانوا أصحاب الفضل منذ البداية فى الثورة المصرية فقد أرونا المثال الحى لشعب ثائرا حقا ضد الظلم و الطغيان و كانوا خير داعما للثورة المصرية بالنصيحة و شد الأزر ....



ولا يستطيع أحد أن ينكر جميلهم الذى يجب ان نحتفظ به جميعا فوق رؤوسنا فى مساندة المصريين الفارين من جحيم القذافى اليهم و برغم صغر القرى على الحدود الليبية التونسية الا انهم استقبلوا مئات الألاف بالترحاب و عمت حملة تبرعات كافة أرجاء تونس و كانت تتجه يوميا بالمساعدات الى المصريين على الحدود الليبية...
لن أتكلم كثيرا عن ما حدث أمس و كيف اننا أسأنا الى مصر قبل أن نسىء الى اى شخص أخر .. 
اللى شفناه امبارح للأسف كان سلوك متخلف و طبعا لانه على الهواء مباشرة "فضيحتنا بقت بجلاجل" , طبعا الرأى الأكبر بيقول ان دى الثورة المضادة و ان فيه اتهامات لناس كتير جدا بتدبير الأمر و الدلائل كثيرة كترك جميع الأبواب الصفراء الحاجزة بين الجماهير و الملعب مفتوحة برغم انها فى الطبيعى تكون مغلقة و السماح للجميع بدخول الاستاد بدون تفتيش برغم ان البلد فى حالة طوارىء حقيقية و اصلا فى الطبيعى المفروض ان بيكون على البوابات أجهزة لكشف المعادن ....
بعد كده شفنا طبعا المذيع ايمن الكاشف و المخرج بيوصيه أنه ينسب الامر للثورة و هو طبعا متوصاش و راح على طول منفذ الأمر و الفيديو موجود على اليوتيوب على فكرة و شفنا كمان الفيديو التانى بتاع الراجل اللى بيقول "دى ثورة كلاب - ثورة حرامية ولا يوم من ايام حسنى" يعنى دون عن 35الف متفرج راحوا صوروا الراجل ده و على طول نشروا الفيديو ..

ما علينا  اللى عاوز اتكلم عليه بجد بقى هو نقطة مهمة جداا .. الثورة بقت متهمة بحاجات كتير اوى و صار همنا الشاغل بدل ما نستكمل المسيرة و نحاسب الخونة و نسترد فلوسنا اننا ندافع عن الثورة و نزاهة أهدافها و صرنا فى حالة دفاع مستمر عن النفس و طبعا ده جزء من المخطط ... 
طيب انا بس عاوز أسأل سؤال واحد هى الثورة جابت شعب جديد من برة مصر اديتله الجنسية؟ هى الناس اللى عملت كده و كل يوم بتعمل مصيبة فى البلد مش كانوا عايشين أيام مبارك ؟ و متقوليش ان مبارك كان هو اللى حايشهم عننا .. مبارك أصلا ميعرفش حاجة عننا .. بذمتك فى العشر سنين الاخيرة شفت مبارك كام مرة بيعمل حاجة للبلد غير انه يطلع فى عيد العمال يقول كلمتين ولا انه طلع فى 2005 من غير جرافتة علشان يرشح نفسه ... 
مبارك كل اللى يعرفه عننا ورقة بتطحطله على مكتبه الصبح و مبيقرهاش باعترافه هو شخصيا لما كان بيقول خطاب وواحد سأله بتقرأ التقارير قاله كبر مخك "موجود على اليوتيوب برضه"
هتقوللى امال ليه البلطجة دى حصلت لما الثورة قامت؟ هقولك ان وزير داخلية مبارك هو اللى سحب الشرطة من الشوارع و هو أصلا السبب فى كره الناس للشرطة بتشجيعه لهم انهم يمارسوا البلطجة على الشعب.

الثورة كانت ضد مبارك و نظامه الفاسد اللى هم نفسهم اللى بيعملوا اللى بيحصل انهارده ده ... حاول تشغل مخك بس شوية و تفكر من له مصلحة فى هدم شكل الثورة قدام الناس غير اللى تضرر منها و اتكشف على حقيقته و الناس بتطالب انه يتحاكم ... 
من له مصلحة فى تشويه صورة الثورة غير اللى سرق مليارات و محبوس دلوقتى بعد ما كان يأمر فينفذ أمره على الفور .. من له مصلحة فى هدم الثورة غير من كانت له سلطة مطلقة و بيعمل اللى هو عاوزه فى البلد و فجأة اصبح مطارد و مهدد انه يدفع ثمن كل جرائمه؟؟؟؟؟

شباب الثورة هم أبعد ناس عن انهم يتصرفوا بهمجية مش لانهم مؤدبين و متربيين و غاسلين ايديهم بالصابون لا ، بس لانهم حاسين دلوقتى بفخر و حاسين انهم قدموا حاجة كويسة لبلدهم و حاسين انهم ابطال فمن الطبيعى لما تصفق لشخص علشان عمل انجاز مش هيجى بعدها بدقيقة و يعمل قدامك حاجة تقلل من شأنه ! أكيد انه هيحاول يكبر انجازه و يحافظ عليه ..!!

يبقى من الطبيعى انك متحاسبش حد بذنب حد تانى و لو مش شباب الثورة هم اللى بيبلطجوا يبقى اللى بيبلطج ناس تانية الثورة بريئة منهم تماما ..
ناس اتربوا و كبروا فى حضن النظام الفاسد و هو المسؤول الأول و الأخير عنهم .. النظام الفاسد هو اللى نشر الجهل و الفقر و الذل و الظلم بين الناس و هى دى الاسباب الرئيسية للبلطجة ..
متنساش ان الثورة اول ما بدأت بدات على النت بين شباب متوسطين مثقفين و هم اللى دعوا لها علشان يتخلصوا من نفس الحاجات اللى فاتت الجهل و الظلم و الفقر و الذل  يعنى الثورة قامت من شباب مثقف ضد البلطجة بجميع انواعها ... 

لو انت بعد ده كله لسة مصر على اتهام الثورة بانها مسؤولة عن اللى بيحصل فى البلد يبقى حاجة من اتنين يا أما انت راجل مثقف و بتتهم المثقفين المصريين اللى عملوا الثورة انهم بلطجية فبالتالى انت من ضمنهم و حضرتك برضه بلطجى لانك من ضمن المثقفين المصريين .. يا أما حضرتك راجل جاهل مش فاهم حاجة و بالتالى انت برضه بلطجى و عندك احد عوامل البلطجة و بتمارس البلطجة الفكرية على الاقل و بتتهم الناس بالباطل ...

أخيرا احب اقول للراجل بتاع الاستاد اللى طلع فى الفيديو بيشتم فى الثورة "الثورة مش ثورة كلاب ولا ثورة حرامية " الثورة يدها نظيفة و الكلاب و الحرامية عارفين نفسهم كويس و اذا كنت بتبكى على ايام مبارك فاقول لك ان "الأحرار يبكون شهدائهم و العبيد يبكون جلادهم" .

لو عاوزين تقضوا على البلطجة لازم تقضوا على منبعها و هو النظام البائد و اعوانه .. و لو عاوزين البلطجة تستمر و تكون هى القانون السائد يبقى القضاء على الثورة هو الحل!!!! ...

فكر بمخك و متسمعش كلام حد ...

توقيع : صعيدى من مصر