محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

الأربعاء، 2 يناير، 2013

مصرى ولا مكنة ؟؟؟


   دايما مبنفتكرش المصريين فى الخارج غير لما يكون عندنا مشكلة اقتصادية و عاوزينهم يحولوا فلوسهم و يحلولنا المشكلة ..

و كأن المصريين فى الخارج عبارة عن حصالة بنرمى فيها الفلوس الفضة و اول ما نتزنق نجرى عليها علشان تحللنا ازمة..

ممكن اسأل حضرتك سؤال؟؟ تعرف ايه عن المصريين اللى برة غير انهم مكنة فلوس لما تحتجها تدوس عليها تنزلك دولارات؟؟


تعرف ايه عن احساس أب اتحرم انه يشوف ابنه او بنته بيكبروا قدام عينيه علشان يوفرلهم لقمة عيش مش لاقيها فى بلده؟؟
تعرف ايه عن احساس شخص كل علاقته باولاده حكاوى بتحكيهاله مراته لما بينزل كل سنة عن اللحظات اللى اى بنى أدم فى الدنيا بيحلم انه يعيشها انه يشوف اولاده بيكبروا قدامه؟؟

تعرف ايه عن احساس شخص لما بينزل بكل لهفة بعد غيبة طويلة علشان ياخد ولاده فى حضنه يجروا منه يستخبوا ورا امهم علشان خايفين منه لانهم مش عارفينه؟
تعرف ايه عن احساس شخص كل علاقته بمراته مكالمة تليفون او شات على الانترنت و لما ينزلها كل سنة ولا سنتين بيبقوا مكسوفين كأنهم لسة بيتعرفوا على بعض؟؟
طيب تعرف ايه عن احساسه و انت بتهاجمه لما يقول رأيه فى احداث البلد على النت و تقوله انت ايه اللى دخلك انت برة مصر مش شايف حاجة؟؟ و كأنك بتتهمه بالخيانه مثلا لمجرد سفره علشان لقمة العيش اللى مش لقيها فى بلده !!


طيب تعرف ايه عن احساسه و هو برة البلد و عمال يسمع منك عن الانفلات الامنى و حوادث الخطف و الاغتصاب و السرقة و القتل وهو سايب مراته و عياله فى مصر لوحدهم؟؟!!

طيب تعرف ايه عن احساسه و هو بيتهان برة من ناس غريبة و ابسط كلمة ممكن يسمعها لو اتظلم و طالب بحقه هى "لو كنت لقيت تاكل فى بلدك مكنتش جيت هنا يبقى تشتغل وانت ساكت" ؟؟
طيب تعرف ايه عن احساسه و هو رايح السفارة المصرية يستنجد بالمصريين اللى هناك على امل انه يلاقى حد يرفع عنه الظلم فيلاقيهم بيقولوله ملناش دعوة بيك ؟؟

طيب تعرف ايه عن احساسه و هو راجع مكسور مطاطى راسه للى ظلمه بعد ما سفارة بلده خذلته و الظالم بيبصله بانتصار؟؟
طيب تعرف ايه عن احساسه بعد ده كله لما برضو بيدوس على كرامته و يشتغل علشان يوفر لولاده حياة كويسة مش هيعرف يوفرهالهم لو رجع مصر؟؟

طيب تعرف ايه عن احساسه لما ولاده يكبروا شوية و يلاقيهم بيتصلوا بيه يفرح و يرد عليهم بلهفة يلاقى كل المكالمة محتواها انهم محتاجين فلوس و كأنه بالنسبة لولاده اصبح بس عبارة عن مكنة فلوس ليس الا؟

طيب بلاش كل ده ممكن اسأل مصر بعد الثورة عملت ايه للمصريين فى الخارج علشان يحسوا انهم مصريين؟؟ هل ساعدتهم الدولة بحاجة؟؟ هل حتى تم تغيير و اعادة تطوير نظام السفارات و القنصليات برة علشان نساعدهم؟؟

انت عارف الفلبين الدولة الفقيرة اللى بنتريق عليها علشان اغلبهم بيشتغلوا خدامين و سواقين و كده عاملة ايه لرعاياها برة؟؟
الفلبين عملت التوظيف برة عن طريق مكاتب مرخصة من الدولة و اى حد يخرج برة الفلبين يشتغل لازم يكون عن طريق المكاتب دى و المكاتب دى هى اللى بتتعاقد مع الشركات فى الدول الاجنبية او مع الكفيل فى دول الخليج و لو حصلت اى مشكلة مع اى مواطن و كفيله او شركته بيروح السفارة و السفارة على طول بتتصل بالمكتب اللى متعاقد مع الشركة دى و لو ثبت ان الشركة او الكفيل مش بيدى للعامل مستحاقته السفارة بترجع العامل على الفلبين و بترفع هى قضايا ضد الشركة دى و بتقفل المكتب المتعاقد معاها فى الفلبين و بتحط الشركة او الكفيل ده فى بلاك ليست ممنوع اى مكتب تانى يتعاقد معاه فى الفلبين او يصدرله عماله و لما بتجيب للعامل مستحاقته بتبعتهمله و هو قاعد معزز مكرم فى بلده !!

احنا بقى عملنا ايه للمصرين فى الخارج؟؟ حاول قبل ما تطلب منهم الدولارات و تريل عليها تحط نفسك بس مكان واحد منهم و فكر هل هو بيلاقى الفلوس فى الشارع زى مانت بتفكر ولا بيدفع تمنها فعلا ؟؟


انت عارف ان المصرى برة مصر و هو راجع بيضطر يبيع سيارته بسعر بخس جدا و بيخسر فيها كتير لانه ميقدرش ينزلها مصر لان الدولة بتطلب منه جمارك قد تمنها مرتين؟؟ 
يعنى على الاقل مكلفناش خاطرنا و عملناله اعفاء جمركى على سيارته الخاصة فى حين انك بتعفى رجال الاعمال و اصحاب شركات السياحة من الجمارك على سيارتهم؟؟!!
يا سيدى خليه يحط فلوس جمارك عربيته وديعه باسمه فى بنك مصر لمده 3 سنين يبقى هو استفاد و البلد برضو استفادت!!

انا على فكرة مش ضد ان المصريين يقفوا مع بلدهم و يحولوا دولارات علشان الاقتصاد بالعكس ده واجب عليهم بغض النظر هم مؤيدين للنظام او ضده لان ده فى النهاية فى مصلحة مصر بس انا برضو ضد انك تاخد منهم و متديلهومش حقهم

و طبعا انا ضد استاخدمهم فى الحرب السياسية الساذجة اللى بتزيد الانقسام و بتسخن المصريين على بعض كل يوم .. يعنى لو فيه مصرى بالخارج غير مؤيد للنظام و انت بتطالبهم بعمل حمله لانقاذ مصر يبقى لما الراجل ده لما يحول فلوس متقولش انه بيحول لانه مؤيد للنظام لا هو بيحول فلوس علشان مصر بغض النظر مؤيد لمين او معارض لمين ..


حاول تتعامل مع المصرى فى الخارج على انه مصرى مش مكنة فلوس ...

اعتبره ابوك يا اخى !!



توقيع : محمود عبد الحفيظ
 صعيدى من مصر