محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

الأربعاء، 17 أغسطس، 2011

ماذا يحدث لعملاء مصر للطيران فرع طلعت حرب؟؟!!

بقلم : محمود عبد الحفيظ

ماذا يحدث لعملاء مصر للطيران فرع طلعت حرب؟؟!!


بعد اجازتى السنوية التى ابتعدت فيها عن عملى و انقطعت حتى عن الكتابة فى المدونة ...
و فى اخر أيام اجازتى التى قضيتها فى القاهرة كنت أريد تعديل موعد سفرى عبر خطوط مصر للطيران فتأهبت للذهاب الى فرع الشركة فى شارع طلعت حرب و الذى يبعد امتار قليلة عن ميدان التحرير  ... 
 

عند وصولى للشركة وجدت شخص يقف على باب الشركة ...



قاللى : أيوة يا استاذ انت عاوز تحجز أو تغير حجز .. 
قلت : ايوة
قاللى : من المكتب التانى مش من هنا ...
قلت : فين المكتب التانى ده؟

شاورلى عليه و قاللى المدخل اللى على اليمين ده ...
رحت مكان ما قاللى و لقيت مدخل عليه يافطة مصر للطيران ... كان المكان عبارة عن شقة فى الدور الارضى معمولة مكتب ..
دخلت لقيت ناس كتير قاعدين جنب بعض بيشتغلوا و كان فيه ناس كتير برضو بيحجزوا ...


رحت لواحدة من اللى بيشتغلوا قلتلها لو سمحتى عاوزاغير الحجز بتاعى عاوز اسافر بكرة ..

اخدت التذكرة و قعدت تشتغل على الكمبيوتر و قالتلى فيه بكرة الساعة 2 الظهر قلتلها ماشى ..
قالتلى رسوم التغيير 300 جنيه ادفع عند الاستاذ ..
رحت دفعتله الفلوس قاللى خلاص .. قلتله مفيش وصل قاللى لا روح استلم التذكرة على طول ..

طبعتلى البنت التذكرة و كتبتلى عليها التعليمات و انى لازم اكون فى المطار قبل الميعاد بفترة و الى اخره ..
قلتلها طيب تذكرتى القديمة قالتلى لا دى هنحتفظ بيها ...

اخدت منها التذكرة اللى طبعتهالى و محطوطة فى ظرف مصر للطيران و لما خرجت شكيت فى الموضوع فرحت مكتب مصر للطيران اللى الراجل كان واقف قدامه و هو المكتب الرئيسى بتاعهم و لقيت الراجل واقف هناك على الباب برضو بس مش لوحده كان فيه 2 تانى و كلهم بيشاوروا لاى حد يجى على المكتب التانى .. المهم دخلت المكتب و سألت واحد هو انتوا ليكم فرع تانى هناك ؟؟ قاللى لا


قلتله طيب انا الراجل اللى على الباب وقفنى وودانى المكتب اللى هناك رد علية و قاللى و انت بتسمع كلامه ليه؟؟

قلتله طيب انا عاوز اتأكد من الحجز ده .. قعدت قدام موظفة و شافت التذكرة قالتلى لا انت ميعادك زى ما هو متغيرش لبكرة ولا حاجة و قالتلى اصلا معندناش حجز بكرة مفيش غير انهارده ... المهم غيرت الحجز و اتكلف 180 جنيه بس ..

  قلتلهم فى مصر للطيران انتوا ازاى سايبين الناس دول كده بياخدوا كل اللى يجيلكم حتى السياح الاجانب قالولى والله احنا بلغنا الجيش و الشرطة و مفيش فايدة ...


المهم خرجت و رجعت للمكتب بتاع النصابين تانى و مسكت الموبايل على ودنى كأنى بتكلم و دخلت على الولد اللى بيستلم الفلوس هناك قلتله انا معايا لواء شرطة على التليفون انا عاوز فلوسى يا حرامية ...

وقتها كان فيه ناس كتير فى المكتب بيحجزوا حوالى 20 واحد  تقريبا و كان منهم 3 اجانب اوربيين كانت البنت بتكلمهم انجليزى ..

المهم هم على طول حاولوا يهدوا الموقف معايا علشان محدش ياخد باله بس انا كنت بحاول أعلى صوتى علشان الناس اللى بيحجزوا ياخدوا بالهم ..

قالولى طيب هنديك حضرتك فلوسك بس اتفضل ادخل جوة و كانوا بيفتحولى اوضة ادخلها انا مرضيتش ادخل لانى معرفش فيه ايه جوة قلتلهم انا هاخد فلوسى هنا ...

المهم على طول علشان الناس مياخدوش بالهم قالولى دفعت كام قلتلهم 300 جنيه .. 
راحوا دفعوهملى و اتلم علية حوالى 5 او 6 تقريبا بلطجية خرجونى برة و خطفوا منى التذكرة اللى كانوا طابعينهالى و قالولى خلاص اخدت فلوسك امشى ....


انا خرجت بس كنت مضايق جدا على الناس اللى بتحجز عندهم و خصوصا ان فيه اجانب و بعدين دول بينصبوا باسم مصر للطيران يعنى سمعه زى الزفت لمصر ...

و بعدين انا كنت بغير حجز بس ب300 جنيه تخيل اللى بيحجزوا تذاكر دولية 4000 او 5000 جنيه يعنى مبالغ كبيرة جدا و مفيش حجز اصلا بيدهولهم دول بيطبعوا ورق بس..

المهم رحت على الأمن المركزى اللى عند الميدان و شفت هناك ظابط قلتله قاللى احنا هنا لتأمين الميدان بس

مشيت لقيت اتنين ضباط شرطة فى شارع تانى قلتلهم قالولى روح شرطة السياحة بلغ عنهم و بعدين احمد ربنا انك اخدت فلوسك ...



المشكلة فعلا انى مكانش عندى وقت لانى كنت غيرت حجزى و مسافر فى نفس اليوم فمقدرتش اروح ابلغ قابلت واحد من الشرطة تانى قريب من مكان المكتب ده قلتله قاللى فيه ناس كتير بلغوا عنهم و مفيش فايدة !! و احمد ربنا انك اخدت فلوسك ...

سؤالى الوحيد دلوقتى هل تأمين ميدان التحرير بألاف عساكر الأمن المركزى اهم من تأمين عملاء مصر للطيران اللى اغلبهم سياح اجانب و يسيبوهم يتنصب عليهم عينى عينك كده دون اى تدخل من الشرطة ؟؟


كل ما كتبت حقيقة و انا شاهد عليها و أتحمل مسؤوليتها ولا اعلم ان كان لموظفى مصر للطيران يد فى مساندة هؤلاء أم لا .... هل هذه هى مصر التى كنا نتمنى ان نراها بعد الثورة؟؟ 

كلامى هذا اعتبره بلاغ للنائب العام من فضلكم اغيثونا .. هو ده الفساد اللى بنتمنى فعلا اننا نغيره وهو ده دور الشرطة الحقيقى اللى عاوزين نشوفه و هم دول اللى نفسنا نشوف الأمن المركزى بيتعامل معاهم بجد ....


توقيع : محمود عبد الحفيظ
صعيدى من مصر