WNR

WNR
World News Reader

الثلاثاء، 8 مارس 2011

أنا أعترض ... مش عارف على ايه بس بعترض

بقلم  محمود عبد الحفيظ
 هو ليه فيه ناس بتحب تهيص فى الهيصة و تظيط فى الظيطة؟ هل هذا هو طبع المواطن المصرى أصلا ولا دى عادة مكتسبة؟

هى ايه الحكاية يا جماعة؟ ايه الموضوع بالظبط ؟ ايه اللى بيحصل فى مصر بالظبط؟ 



انا اقولك يا سيدى ايه اللى بيحصل فى مصر، الناس زعلانين من الثوار اللى كانوا فى ميدان التحرير و يقولوا بتوع ميدان التحرير واقفين حال البلد
و انهم بيظيطوا فى الظيطة و بيهيصوا فى الهيصة، 
رغم اننا اول مرة فى التاريخ نشوف رئيس وزراء بيتعين بناء على اختيار الشعب  و متقوليش ان الناس اللى فى ميدان التحرير هم اللى اختاروه و انهم مبيمثلوش الشعب المصرى ، لا بيمثلوا الشعب المصرى هقولك بيمثلوه ليه؟ 
بيمثلوه لان حضرتك قاعد فى بيتك و مش مكلف نفسك تروح تنضم و تقول رأيك فبالتالى محدش هيعدى على حضرتك فى البيت و يقولك هاه تحب حضرتك تختار مين؟ زى الانتخبات بالظبط لما كانت بتتعمل اغلبنا و أنا نفسى اهه واحد من الناس كنا بنفضل ننتقد المرشحين و نقول ده حرامى و ده مرتشى و الانتخبات مزورة رغم ان احنا مكلفناش نفسنا حتى و رحنا طلعنا بطاقة انتخابية فطبيعى ان صوتك مش هيتسمع لان انت اللى حابسه بنفسك انما الناس اللى فى التحرير اتجمعوا هناك و كلفوا نفسهم و راحوا و لقوا هناك مفكرين و رجال سياسة مخضرمين و كتاب و ادباء و شيوخ و علماء اقتصاد و دكاترة و مهندسين كلهم بيفكروا و بيعملوا اجتمعات و مناقشات و بيفهموا الشباب اللى هناك و بيناقشوهم و لما بيقولوا مطلب من المطالب او رأى من الاراء بيكونوا ناقشوه كويس من كل الجوانب و اقتنعوا بيه كلهم و لما اتكلموا فيه و طالبوا بيه جيت حضرتك و انت فى بيتك معجبكش الكلام و قلت لا دول مبيمثلونيش دول هم اللى خاربين البلد و مش مخليين الشرطة تنزل تشوف شغلها رغم انى مش فاهم لغاية دلوقتى ايه العلاقة بين ناس كانوا واقفين فى التحرير بيطالبوا بدستور جديد يدينى و يدى لحضرتك كامل حقوقنا و حريتنا و بيطالبوا باحلال جهاز أكلى لحوم البشر "أمن الدولة" و بين ان الشرطة تنزل تشتغل. معلش ممكن كلامى ده يزعلك بس هى دى الحقيقة و حقيقة تانية هقولها بصراحة أنا شايف ان كل رجل شرطة نزل الشارع اشتغل الايام اللى فاتت رجل شريف فعلا يستحق كل تقدير و كل رجل شرطة قاعد فى بيتهم لغاية انهاردة و شايف اللى بيحصل فى مصر ده و مش مكلف نفسه انه يرجع شغله هو خائن للأمانة و خائن للقسم الذى أقسمه ، مينفعش ان احنا نتحايل علي الشرطة علشان ينزلوا يشتغلوا ده واجبهم و هم اللى اختاروا الوظيفة دى من الأول و أقسموا انهم يحموا مصر فى اى ظرف يبقى لازم يعملوا كده ، ده احنا ناقص نعدى عليهم واحد واحد فى بيته نقوله يلا بقى يا حبيبى انزل علشان خاطر ماما!!!!


وسط ده كله و كم الاعتراض اللى حضرتك معترضه على شباب التحرير و بتقول انهم وحشين و شريرين علشان بيدافعوا عن حقوقى و حقوقك من ناس كانوا واكلين البلد بطريقة احنا فعلا مكناش نتخيلها و لا نتصورها الا لما شفنا ملفات الفساد اللى اتفتحت بعد ما مشيوا ولا كنا نتخيل ان الفساد ده كله كان فى مصر ولا كم الفلوس المنهوبة دى ، تناسينا كل ده و تناسينا الناس اللى كنا بنشوفهم فى التلفيزيون عايشين فى عشش من الكرتون و من الخشب و بياكلوا الزبالة و ابتدينا نشوف صفحات و ناس بتطالب بتكريم الحرامية اللى سرقوا المليارات و عاوزين يردولهم الجميل طب هو ايه الجميل اللى هنرده ممكن افهم، هل جميل ان 40% من المصريين كانوا تحت خط الفقر مش لاقيين ياكلوا و البهوات عمالين يهربوا المليارات برة البلد؟ ولا جميل وزارة الزراعة اللى استوردتلنا شتلات مسرطنة من اسرائيل؟ ولا جميل الغاز بتاعنا اللى كان بيعدى من تحت رجلينا و احنا بنموت بعض على انبوبة بوتجاز علشان يروح اسرائيل بخسارة 10 مليون جنيه يوميا لمصر ؟ ولا ايه بالظبط علشان الجمايل كتير و الواحد مش قادر يعدها؟
و فى الاخر لما حضرتك تبدء تتحرك و تقول كفاية بقى بدل ما تروح التحرير و تطالب بحقوق المصريين كلهم حضرتك رحت عملت اعتصام فئوى مع زمايلك قدام شغلك ووقفت المصلحة او الشركة او البنك اللى انت بتشتغل فيه و طالبت بتعديل وضعك و مرتبك . يبقى بذمتك انت مين اللى بيهيص فى الهيصة و بيظيط فى الظيطة و مين اللى وقف حال البلد؟