بقلم : محمود عبد الحفيظ
أولا انا بطالب بعمل نقابة للبلطجية ... ايوة مستغرب ليه؟ انا بطالب بعمل نقابة للبلطجية .. و يتم فيها تسجيل البلطجية كلهم و يكون الاشتراك فيها بسعر رمزى او بلاش فلوس خالص يكون الاشتراك بقرش حشيش او شريطين برشام !!
هتقوللى ايه الكلام اللى انت بتقوله ده يا عم انت؟
هقولك يعنى مستغرب من كلامى ده و مش مستغرب و انت عارف و انا عارف كويس اوى ان البلطجية كلهم معروفين بالاسم و متسجلين فى كل اقسام الشرطة و معروفين كمان فى المناطق بتاعتهم كويس اوى.. و مع ذلك محدش كلف خاطره و راح لمهم بموجب قانون الطوارىء اللى نفسنا مرة فى حياتنا يشتغل شوية فى صالح المواطن و تأمينه...
و مش مستغرب من البلطجية اللى الناس مسكوهم و سلموهم للشرطة بنفسهم و لقيتهم تانى يوم خارجين و جايين ينتقموا منك؟ ..
و مش مستغرب من تجار المخدرات اللى الناس بلغت عنهم بدل المرة 25 مرة و لسة واقفين بيبيعوا مخدرات فى الشارع عينى عينك عادى؟ دول لو كانوا بيبيعوا امشاط و فلايات كانت على الاقل البلدية نزلت مسكتهم!..
اهه على الاقل لما نعمل نقابة للبلطجية و يروحوا يسجلوا نفسهم فيها و يقسموا بعض حسب المناطق هنضمن ان محدش هيبلطج فى منطقة التانى ...
و احنا كمواطنين هنكون عارفين بلطجية المنطقة ...
يعنى مثلا انا ماشى فى المنطقة دى عارف انها تبع "سيد بشلة" يبقى لو اى حد غير "سيد بشلة" و رجالته ثبتنى اروح على طول اشتكى للسيد بشلة و اقوله الحق يا كبير انا واحد غريب ثبتنى فى منطقتك ..
اى نعم لما "سيد بشلة" يروح هو و رجالته يجيبوا البلطجى الغريب ده من قفاه و يدوله علقة موت مش هيرجعلى حاجتى بس اهه الواحد برضو يبقى عنده انتماء لبلطجية منطقته و على رأى المثل "نار سيد بشلة ابن منطقتى ولا جنة اى بلطجى تانى"
احنا لا سمح الله بنشكك فى الشرطة و دورها ولا حاجة ولا زعلانين من الضباط اللى لسة نفسيتهم مجروحة لغاية دلوقتى ..
احنا بس عاوزين قانون زى القانون اللى اتعمل بتاع "تجريم الاعتصام و المظاهرات" نعمل قانون تنظيم البلطجة بلاش تجريم البلطجة يمكن تكون صعبة ولا حاجة بس اهه على الاقل ننظمها ..
و نطبع كتيبات على الناس نعرفهم حدود منطقة كل بلطجى و نعمل "هوت لاين" خط ساخن يعنى علشان البلطجية يفهموا و نحطيلهم "نيم تاج" و يبقى فيه كارنيه لكل بلطجى لما يثبتك تقوله ممكن لو سمحت اشوف الكارنيه بتاعك؟
يقولك طيب امسك بس المطواة ثوانى اطلعهولك .. تمسكله المطواة و اول ما يطلعلك الكارنيه و تتأكد انه البلطجى المسؤول عن منطقتك تديله المطواة تانى و تطلعله كل اللى فى جيبك على طول ...
لو لقيته مش منطقتك تطلع اللى فى جيبك برضو و تتصل على الهوت لاين هتجيلك رسالة صوتية بصوت واحد حشاش "اهلا بيك يا ريس فى هيئة تنظيم البلطجة لو عاوز تكلم حد من المعلمين بتوعنا دوس على نمرة 1 ولو حد من منطقة تانية ثبتك دوس نمرة 2 و قولنا عليه علشان نروح نظبطه"
طبعا انت عاوز تبلغ انك اتثبت من بلطجى برة المنطقة فتدوس على رقم 2...
المشكلة بقى اننا هنحتاج خطوط كتير اوى نظرا للضغط الكبير اللى هنلاقيه فى الاتصالات و هنحتاج اكيد موظفين خدمة عملاء يردوا على الناس ...
ايه ده بجد؟ اما الحق ادى السى فى بتاعى لسيد بشلة يمكن يشغلنى !
أولا انا بطالب بعمل نقابة للبلطجية ... ايوة مستغرب ليه؟ انا بطالب بعمل نقابة للبلطجية .. و يتم فيها تسجيل البلطجية كلهم و يكون الاشتراك فيها بسعر رمزى او بلاش فلوس خالص يكون الاشتراك بقرش حشيش او شريطين برشام !!
هتقوللى ايه الكلام اللى انت بتقوله ده يا عم انت؟
هقولك يعنى مستغرب من كلامى ده و مش مستغرب و انت عارف و انا عارف كويس اوى ان البلطجية كلهم معروفين بالاسم و متسجلين فى كل اقسام الشرطة و معروفين كمان فى المناطق بتاعتهم كويس اوى.. و مع ذلك محدش كلف خاطره و راح لمهم بموجب قانون الطوارىء اللى نفسنا مرة فى حياتنا يشتغل شوية فى صالح المواطن و تأمينه...
و مش مستغرب من البلطجية اللى الناس مسكوهم و سلموهم للشرطة بنفسهم و لقيتهم تانى يوم خارجين و جايين ينتقموا منك؟ ..
و مش مستغرب من تجار المخدرات اللى الناس بلغت عنهم بدل المرة 25 مرة و لسة واقفين بيبيعوا مخدرات فى الشارع عينى عينك عادى؟ دول لو كانوا بيبيعوا امشاط و فلايات كانت على الاقل البلدية نزلت مسكتهم!..
اهه على الاقل لما نعمل نقابة للبلطجية و يروحوا يسجلوا نفسهم فيها و يقسموا بعض حسب المناطق هنضمن ان محدش هيبلطج فى منطقة التانى ...
و احنا كمواطنين هنكون عارفين بلطجية المنطقة ...
يعنى مثلا انا ماشى فى المنطقة دى عارف انها تبع "سيد بشلة" يبقى لو اى حد غير "سيد بشلة" و رجالته ثبتنى اروح على طول اشتكى للسيد بشلة و اقوله الحق يا كبير انا واحد غريب ثبتنى فى منطقتك ..
اى نعم لما "سيد بشلة" يروح هو و رجالته يجيبوا البلطجى الغريب ده من قفاه و يدوله علقة موت مش هيرجعلى حاجتى بس اهه الواحد برضو يبقى عنده انتماء لبلطجية منطقته و على رأى المثل "نار سيد بشلة ابن منطقتى ولا جنة اى بلطجى تانى"
احنا لا سمح الله بنشكك فى الشرطة و دورها ولا حاجة ولا زعلانين من الضباط اللى لسة نفسيتهم مجروحة لغاية دلوقتى ..
احنا بس عاوزين قانون زى القانون اللى اتعمل بتاع "تجريم الاعتصام و المظاهرات" نعمل قانون تنظيم البلطجة بلاش تجريم البلطجة يمكن تكون صعبة ولا حاجة بس اهه على الاقل ننظمها ..
و نطبع كتيبات على الناس نعرفهم حدود منطقة كل بلطجى و نعمل "هوت لاين" خط ساخن يعنى علشان البلطجية يفهموا و نحطيلهم "نيم تاج" و يبقى فيه كارنيه لكل بلطجى لما يثبتك تقوله ممكن لو سمحت اشوف الكارنيه بتاعك؟
يقولك طيب امسك بس المطواة ثوانى اطلعهولك .. تمسكله المطواة و اول ما يطلعلك الكارنيه و تتأكد انه البلطجى المسؤول عن منطقتك تديله المطواة تانى و تطلعله كل اللى فى جيبك على طول ...
لو لقيته مش منطقتك تطلع اللى فى جيبك برضو و تتصل على الهوت لاين هتجيلك رسالة صوتية بصوت واحد حشاش "اهلا بيك يا ريس فى هيئة تنظيم البلطجة لو عاوز تكلم حد من المعلمين بتوعنا دوس على نمرة 1 ولو حد من منطقة تانية ثبتك دوس نمرة 2 و قولنا عليه علشان نروح نظبطه"
طبعا انت عاوز تبلغ انك اتثبت من بلطجى برة المنطقة فتدوس على رقم 2...
المشكلة بقى اننا هنحتاج خطوط كتير اوى نظرا للضغط الكبير اللى هنلاقيه فى الاتصالات و هنحتاج اكيد موظفين خدمة عملاء يردوا على الناس ...
ايه ده بجد؟ اما الحق ادى السى فى بتاعى لسيد بشلة يمكن يشغلنى !
توقيع : صعيدى من مصر
ليست هناك تعليقات:
إرسال تعليق