WNR

WNR
World News Reader

السبت، 12 فبراير 2011

مصر الجديدة

مصر الجديدة

بقلم : محمود عبد الحفيظ



حالة لخبطة جامده اوى دلوقتى مع سواقين التاكسى فى القاهرة خد بالك و انت رايح مشوار لانك لو طلبت من التاكسى يوديك مصر الجديدة هيطلع بيك على طول على ميدان التحرير!

فيه ناس سألونى ليه مش بكتب بقالى كتير قلتلهم مش لاقى حاجة اكتبها لانى اتعودت دايما و انا بكتب انى اشن هجوم على الحكومة او على اى حد دلوقتى مش لاقى حاجة وحشة حوالية علشان اهاجمها دلوقتى مش شايف غير مصر الجديدة

مصر الجديدة مبقتش حى مصر الجديدة بقت معنى - مصر الجديدة يعنى مصر اللى فى 18 يوم بقت كلها خضرا من غير ما حد يزرعها
مصر الجديدة يعنى مصر اللى فى 18 يوم اتحولت من اسود داكن صعب انك تشوف فيه اى نقطة خير الى ابيض ناصع مفهوش نقطة شر واحدة رغم ان المسحوق اللى استخدم لغسيلها كان دم 300 شهيد لونه احمر

اول مرة اشوف الامل فى وجه شباب تملك منه اليأس
اول مرة اشوف ابتسامة ام ابنها مات
اول مرة اشوف سجن مفتوح و المساجين بتسلم نفسها بعد ما كانوا بيهربوا منه من 18 يوم بس
اول مرة اشوف مسلمين و مسيحيين بيحموا بعض و هم بيصلوا بعد فتنة طائفية شديدة اتفجرت قبل شهر واحد بس فى تفجير اثم لكنيسة ليلة راس السنة
اول مرة اشوف الشباب هم اللى بيوقفوا الشرطة يفتشوهم و يتأكدوا من هويتهم و اول مرة اشوف شباب بيحموا بيوتهم و بيوت جيرانهم فى عز البرد ليلا حتى مطلع النهار
اول مرة اشوف الجيران كلهم متجمعين مع بعض فى الاحياء الراقية و بيتعرفوا على بعض و بيسهروا مع بعض للصبح بعد ما كان الجار ميعرفش حتى شكل جاره
اول مرة اشوف الولاد فى مصر بيباتوا فى الشارع مع البنات فى تجمعات هائلة دون حالة تحرش واحدة بعد ان كان التحرش يحدث فى وضح النهار للبنات اللى بتمشى فى الشارع
اول مرة اشوف الشباب مش عاوزين يشربوا سجاير علشان ميرموش اعقاب السجاير فى الارض بعد ما كانت الناس بتحدف القمامة من شباك البيت للشارع
اول مرة اشوف رجال و نساء محترمين كلهم دكاترة و مهندسين و محاسبين و.... بينظفوا الشوارع بايديهم و بينظفوا الحوائط و التماثيل فى الميادين العامة
اول مرة اشوف وجه مصر يبتسم بعد ما تعونا على دموعها
اول مرة احس انا و ال80 مليون ان مصر دى بلدنا
اول مرة فعلا احس احساس المشتاق اللى بينزل يبوس ارض وطنه
اول مرة احس بحضن مصر الدافى فى عز البرد
اول مرة اشوف مصر اللى كنا بنحلم بيها كلنا و كنا فاكرين انها مستحيل تتحقق
اتحققت فى 18 يوم بس انا مش قادر اصدق
اول مرة افهم الحديث الشريف " اذا صلح الراعى صلحت الراعية"
اول مرة اعرف ان الفساد لو اتشال من فوق البلد كلها هتنضف بجد
اتمنى ان الصورة الجميلة اللى موجوده دلوقتى تفضل على طول و اعتقد انها هتفضل لان الشباب تعبوا اوى علشان يحققوا ده و اكيد هيحافظوا عليه
هى دى مصر الجديدة اللى حس بيها ال80 مليون مصرى و اللى مفيش قلم يقدر يوصفه

النائب العام يخاطب عدداً من الدول لتجميد أرصدة مسئولين

صرح مصدر قضائى بأن النائب العام المستشار الدكتور عبد المجيد محمود قرر منع كل من الدكتور أحمد نظيف، رئيس مجلس الوزراء السابق، وأنس الفقى وزير الإعلام، واللواء حبيب العادلى وزير الداخلية السابق، من السفر بناء على البلاغات المقدمة ضدهم، وتجميد حساباتهم وأرصدة العادلى وأسرته بالكامل بجانب كل من المهندس أحمد عز أمين التنظيم السابق بالحزب الوطنى، والمهندس أحمد المغربى وزير الإسكان السابق، والمهندس رشيد محمد رشيد وزير التجارة والصناعة السابق، وزهير جرانه وزير السياحة السابق.















وخاطب النائب العام وزير الخارجية، لمخاطبة عدد من الدول لتجميد أرصدة المسئولين السابق ذكرهم، كما خاطب إدارة الكسب غير المشروع بشأن البلاغات التى تلقتها النيابة العامة لفحصها واتخاذ الإجراءات القانونية بشأنها، وذلك فى الوقت الذى تواصل النيابة العامة مباشرة التحقيقات وفحص جدية البلاغات المقدمة.




















.