محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

الاثنين، 20 يونيو 2011

سيجارتين حشيش و كباية شاى

بقلم : محمود عبد الحفيظ

 كنت بتكلم مع واحد حشاش و بسأله عن رأيه فيما يجرى فى مصر فقالى ... 
يا بيه انا لما الاخبار بتزيد كده و احس انى مش فاهم حاجة اروح على طول قاعد كدة "مستكنيس" و اضربلى سيجارتين حشيش مع كباية شاى تقيل سكر زيادة علشان تعلى الفولت ... وقتها الاقى نفسى فهمت كل حاجة على طول ..




انتابنى الفضول فسألته على الفور طيب ما تقوللى مثال على اللى فهمته من الحشيش و الشاى ...


قاللى طيب خد عندك يا سيدى اولا يوم لما مبارك اتكلم و قال انا مش هترشح تانى؟ قلتله ايوة يوم 1 فبراير ... 

قاللى وقتها انا بصراحة قلت كفاية كده و مجتش من كام شهر و الراجل يمشى بكرامته ..
و رحت ضاربلى السيجارتين و قعدت افكر ... قلت لنفسى انا لما بكون فى خناقة و يتلموا علية ناس كتير و انا لوحدى وبتأكد انى هتبهدل اروح جارر معاهم ناعم على طول و اعمل نفسى محترم و بتأسف لهم و كأن مفيش حاجة لغاية ما اخلع 
و اروح اجيب لهم ناس وارجع و "نحط عليهم" ... 
قلت اكيد الراجل ده بيعمل كده بيجر ناعم و بعد كده "هيظبطنا و يحط علينا" لا يبقى مينفعش نسيبه لازم يمشى دلوقتى.. 

قلتله كويس جدا ده احنا على كده نوزع حشيش على الجماعه بتوع انا اسف يا مخلوع ..


قلتله طيب ايه كمان؟
قاللى خد عندك مثلا وقت لما الجاسوس الاهبل ده اتمسك ... فرحت اوى و قلت قشطة ادى الشغل ولا بلاش قفشنا جاسوس اسرائيلى و من اول قلم اعترف بكل حاجة .. 
و قتها قلت لازم احتفل بالمناسبة دى و رحت ضاربلى سيجارتين حشيش ... 
و بعدين قعدت افكر قلت كويس اوى احنا مسكنا جاسوس غبى عمل كل حاجة تدل انه جاسوس و اعترف بكل حاجة بكل سهولة ..
الله طيب احنا ليه مفكرناش ان ممكن اسرائيل تكون هى اللى عاوزة الجاسوس ده يتمسك؟؟
شديت نفس جامد من السيجارة و قلت ايوة يكونوا عاوزين يوصلوا معلومات معينة لمصر فيحطوا جاسوس اهبل زى ده او بمعنى اصح جاسوس عامل اهبل و يعترف علشان يوجهوا الرأى العام فى مصر لحاجة معينه مثلا ..
  يعنى زى ما بنشوف كده فى الافلام و هو يكون واد صايع اصلا و مهما اتعذب مش هيقول غير الكلمتين دول او يكون اهبل و ميعرفش غير الكلمتين دول ..  و فى نفس الوقت اسرائيل فى تصريحاتها تبين انها زعلانة على الجاسوس اللى اتمسك علشان احنا منشكش فى الحوار ..
و الله نظرية برضو لازم اللى يحقق فى الموضوع ده يكون ادهم صبرى او استاذ نبيل فاروق يعملنا سيناريو حلو كده ندخل بيه على اسرائيل و نشوف ايه الحكاية ...
قلتله طيب و بعدين ؟ قاللى بس و قتها الحشيش كبس على نفسى و نمت .. 


قلت فى نفسى طيب كده لازم اللى يحقق مع الجاسوس ده يبقى ضارب حشيش بس تبقى مصيبة لو كبس على نفسه الحشيش و نام وسط التحقيق


قلتله طيب و ايه تانى ؟؟ قاللى مفيش كنت قاعد برضو بضرب سيجارتين كمان و فضلت افكر هو ايه المفروض يبقى الاول فعلا الدستور ولا الانتخابات ؟؟ 
الناس دول عمالين يتخانقوا على ايه؟ شديت نفس جامد و قلت فرقت ايه يعنى الانتخابات اولا و لا الدستور اولا ؟؟ متكبروا دماغكوا يا جدعان و نشوف المشاكل اللى احنا فيها الاول ..
يعنى مثلا لو اتفرغنا كلنا لمشكلة الامن و حلناها هنحل كل الخلافات دى...
قلتله ازاى؟ قاللى دلوقتى الناس لما قالوا نعم فى الاستفتاء كانوا حاسين ان هو ده الاختيار اللى هيرجع الامن و الاستقرار لمصر حتى لو كان على حساب الثورة صح؟ قلتله تمام ...
قاللى خلاص لو الناس كلها اشتغلت بس دلوقتى فى حل مشكلة الامن و سابوهم من هوس الانتخابات و الرئاسة اللى هياكل دماغهم ده ..
و قدروا فعلا انهم يرجعوا الامن للبلد .. الناس هتثق فيهم و هتسيبهم يعملوا اللى هم عاوزينه .. و هيسمعوا منهم .. الناس عاوزين الامن الاول يا استاذ .. مش عاوزين حد يقولهم حرية و هم خايفين يمشوا فى الشارع !!


مش فارقة كتير مع الناس الغلابة انتخابات و لا دستور الاول المهم ان حد يضمنلهم الامن الاول و ان المادة الثانية من الدستور محدش يقربلها  .. اعملولهم ده الاول هيسمعوا كلامكوا و يثقوا فى اللى انتوا بتعملوه بعد كده ...


قلتله و الله لو على كده يبقى الشعب كله محتاج سيجارتين حشيش و كباية شاى تعلى الفولت

و يا ريت الجماعة اللى كل شوية يطلعوا فى التلفيزيون بمعدل 19 قناة يوميا بث مباشر يضربوا نفسين زيادة و يكبس على نفسهم و يناموا شوية .. علشان الناس زهقت من وشوشهم الكريمة و ناقص يطلعولنا من السيفون و هم دول اللى بيوسعوا الفجوة بين الشعب و شباب الثورة ! ...



فى الاخر خالص المنبه بتاع الموبايل رن و اتضح ان كل الحوار ده كان حلم ... تقريبا كده كنت نايم فى غرزة 


توقيع : صعيدى من مصر