يسقط يسقط حكم السبكى
الوضع القائم فى مصر الان و مستوى الاخلاق .. اسف اقصد "اللاأخلاق" .. يدل على ان من يحكم مصر فعلا هو فكر السبكىعندما تسير فترى ان البلطجة و قلة الأدب و سب الدين و الشتائم هى اللغة السائدة فى الشارع تقدر تعرف ان السبكى نجح فى ان يحكم البلاد و يغزوها فكريا ..
السبكى ليست شركة انتاج ولكن أسلوب حياة ..
أسلوب "اى حاجة تجيب فلوس دوس فيها" ..
اسلوب "اديك فى الجركن تركن" حلوة تنفع مطلع اغنية
اسلوب طالما "السرسجية" بيدفعوا و هيكيشونا يبقى دوس يا برنس"
اسلوب صافيناز الرقاصة هتجيب فلوس بالهبل يا معلم "ايوة كده يا وديع"
السبكى لغة اصبحت هى اللغة الاولى الدارجة فى الشارع رغم انها مش مفهومة ..
لغة "ماتيجى و نجيب مليجى" ..
لغة "العفشة قفشة و بنكح تراب"
لغة المهرجنات و الاغانى اللى مش مفهومة ..
لغة "هاتى بوسة يا بت " و "الشبشب ضاع"
ياااه فين يا عم ايام الزمن الجميل ايام افلام اللمبى و الفن المحترم .. ياااه كانت ايام
ولا عوكل و بوحة "صبح صبح يا عم الحج" كنا فاكرينها قلة ادب و بنقول ايه الانحطاط ده بس بالنسبة للى بنشوفه دلوقتى تعتبر قمة فى الادب ...هو انا صاحى اصلا ولا نايم و بحلم؟؟
ايه اللى بيحصل فى البلد ده؟؟
ايه اللى احنا وصلناله ده؟؟ انا بقيت اسمع كلام من البنات مكنتش بسمعه من اصحابى الولاد زمان !!
العيال الصغيرة فى الشوارع بتشتم و تسب بعلو صوتها عادى خالص و قدام اهاليهم كمان .. و احنا زمان كنا بنخاف نعللى صوتنا بس واحنا بنلعب كورة لحسن اهالينا يطلعونا من وسط الماتش!!
و تيجى تكلم عيل تلاقى العيال كلهم اتلموا عليك و مفيش اى احترام لاى حد كبير فبالتالى بقى كل واحد يخاف ينصحهم ولا يقولهم حاجة لحسن يقل من نفسه !!!
العيال بقت بتشتم الناس الكبيرة عادى .. و احنا لما كان ابو واحد من اصحابنا بس يعدى كنت تلاقينا كلنا متسمرين فى اماكانا محدش يفتح بقه!!
العيال الصغيرة بقت بتشرب بانجو و حشيش و بيتباهوا بكده و الكبار بيبصولهم بحسرة و محدش عارف يتدخل..
لما تلاقى راجل كبير قد ابوك بيقول لعيال بتشتم بعضها فى الشارع عيب كده يروحوا شاتمينه هو كمان !!
تقوله معلش يا حاج حق علية يقولك بحسرة عيال صغيرين هقل نفسى معاهم يعنى؟؟ بجد تتحبس جواك الدموع و متبقاش عارف تعيط على الاطفال و اللى حصلهم ولا على الكبار و قلة الاحترام اللى بيواجهوها ولا على الاخلاق اللى ضاعت ..
تدور وشك الناحية التانية .. تلاقى اعلان صافيناز الرقاصة فى وشك و جنبه اعلان محمد رمضان ماسك مطواة!!
و تيجى تتكلم يقولك ده فن .. و تعترض عليهم يقولك دول فنانين يعنى صفوة المجتمع ..
هو فين المجتمع ده؟؟ هو احنا بقى عندنا مجتمع؟؟
احنا فين يا جدعان و لما دى اخلاق صفوة المجتمع المتعلمين امال اخلاق مسجلين الخطر عاملة ازاى؟؟
لما احنا جيل اتربى على "يوميات ونيس" و "ليايى الحلمية" و "الشهد و الدموع" و المسلسلات الجميلة دى و وصلنا اننا نشوف اللى بيحصل دلوقتى امال بعد 10 سنين جيل السبكى هيشوف ايه؟؟
يعنى الجيل اللى بعد جيل السبكى ده هيبقى ايه؟؟
هل فيه انحطاط اخلاقى ممكن نوصله اكتر من اللى احنا فيه ده؟؟
هل فيه اسوء من كده؟؟
هل فيه اسوء من ان بنت ماشية سواء كانت لابسة عادى او محترمة او محجبة او منقبة مش مأمنة على نفسها و بيتحرشوا بيها لفظيا و جسديا؟؟
هو فيه اسوء من انك تكون مش حاسس بأمان على اختك و مراتك و تبقى خايف و مرعوب انها تمشى لوحدها؟؟
هو فيه اسوء من انك تحس انك مش قادر تحمى أهل بيتك و من مين من شوية عيال؟؟
و بالنسبة لاسوء و افشل ناس فى الدنيا .. وزارة "انعدام التربية واللا تعليم" مش حاسين باى مسؤولية خالص قدام غزو السبكى؟؟
مش فالحين فى اى حاجة غير انهم يشغلوا اغنية "تسلم الايادى" و يخلوا الطالبات يرقصوا عليها؟؟
مش حاسين انكوا فى موضع مسؤولية عن جيل بناتكوا هيكونوا اول ضحاياه؟؟
مش حاسين بغيرة على ولادكوا؟؟
مش حاسين انكم الجهة الاولى اللى المفروض تتصدى للغزو ده ؟؟
ولا انتوا كمان وصلتلكوا لغة السبكى بدل اللغة العربية و بقيتوا تقولوا "نفض يا عم" احنا مالنا .. "اعمل من بنها" ؟؟
طالما مش هيأثروا على الدروس الخصوصية و المصالح يبقى "فكك" ؟؟
طب و "اللارقابة" اللى بيوافقوا على الافلام دى طبعا قابضين كويس و السبكى مظبطهم فمش محتاجين يتكلموا فى حاجة..
ماهو متقنعنيش ان انت هتكون انسان عاقل شغال فى الرقابة على الافلام و هتوافق على الاسفاف ده من غير ما تكون قابض !!
طب وانت ياللى قاعد بتقرا الكلام ده دلوقتى .. بزمتك مش حاسس انك عاوز تعيط على الحال اللى وصلناله؟؟
مش حاسس انك عاوز تبكى على الغزو و الافكار الغريبة اللى بيروجها لاطفالنا جاهل زى السبكى و شوية بلطجية و رقصات؟؟
بزمتك و انت ماشى فى الشارع فى العيد و شايف العيال الصغيرة بتتحرش بالبنات و بيشربوا مخدرات مبيبقاش نفسك تصرخ من جواك و تقول "يسقط يسقط حكم السبكى"؟؟
قلبك مبيصرخش و ينط من مكانه و يهتف "لو كان السبكى رجلا لقتلته" .. :|
مبتنتفضش على الاخلاق اللى ضاعت حتى بينك و بين نفسك؟؟
مبتلومش نفسك لما بتنساق مع الموجه و تفقد اخلاقك شوية علشان تعرف تعيش و تقول اصلنا مش هينفع نعيش دلوقتى الا بقلة الادب ..
لو لسة بتلوم نفسك يبقى فاضل شوية الحقهم قبل ما السبكى يجرفهم بجرافته
قبل ما تصحى تلاقى نفسك بقيت من فلول السبكى و بتهاجم اى حد بيهتف "يسقط يسقط حكم السبكى" ..
صعيدى من مصر
محمود عبد الحفيظ
