WNR

WNR
World News Reader

الأحد، 20 مارس 2011

ارفع صباعك فوق انت مصرى


بقلم : محمود عبد الحفيظ

ياااه معقول احنا فى مصر يا جماعة؟ انا مش مصدق نفسى.!! مش هو ده الشعب المصرى اللى كانوا بيقولوا عليه شعب متخلف و عمره ما هيتقدم؟ فجأه كده تغير الشعب من النقيض الى النقيض؟ 



معقول فى مصر فيه احترام لطوابير بالالاف؟ معقول يبقى اللى واقف قدامى فى الطابور مختلف معايا ورايح يقول حاجة عكس اللى هقولها و احنا الاتنين واقفين نهزر مع بعض مش بنتخانق مع بعض؟
يعنى فعلا المشكلة مكانتش فينا المشكلة كانت فى الفساد اللى فوقينا أول لما مشى ابتدى حالنا ينصلح اهه.
مش مشكلة نتيجة الاستفتاء نعم او لا انا بالنسبة لى نتيجة الاستفتاء ظهرت خلاص " جبتها من الكنترول " نتيجة الاستفتاء بالنسبة لى هى احترام الناس للطوابير اللى وصل بعضها لاطول من كيلو فى بعض الاماكن!! يا جماعة انتم متخيلين ان الطوابير دى مكانتش طوابير علشان صرف المعاش و لا طوابير عيش ولا طوابير أنبوبة بوتجاز... دى طوابير استفتاء على الدستور .. يا جماعة لغاية 3 شهور فاتوا لو كنت سألت الناس فى الشارع ايه هو الدستور أصلا يمكن كنت تلاقى الاغلبية العظمى متعرفش و اللى يعرف هتلاقيه عمره ما قرأه ، دلوقتى مصر كلها بالملايين رايحين يستفتوا عليه؟ تخيل انت التغيير اللى حصل فى مصر عامل ازاى؟
تخيل نظام مبارك كان حاطط على عنين الشعب غمامة عاملة ازاى ، كان مخليهم اقصى حاجة يفكروا فيها انبوبة بوتجاز و رغيف عيش ، تخيلوا ان فى مصر مش فى اوروبا ولا امريكا لا فى مصر الناس بتطرد محافظ القاهرة علشان مبيلتزمش بالطابور و بيدخل على طول؟ انا مش قادر أصدق !!! تخيلوا ان فى مصر رئيس الوزراء ينزل يستأذن الناس واحد واحد علشان عاوز يدخل يصوت و معندوش وقت يقف فى الطابور؟!!! تخيلوا ان فيه عروسة و عريس فى يوم فرحهم نزلوا وقفوا فى الطابور بالبدلة و الفستان بتوع الفرح وصوتوا فى الاستفتاء و غمسوا صباعهم فى الحبر الفسفورى و خرجوا من لجنة الاستفتاء فى زفة!!!
حاول تفكر فى ده كله و تخيل انك من 3 شهور بس لو كنت حكيت الكلام ده لأى شخص فى مصر كان قالك مستحيل يحصل ولا حتى بعد 20 سنه.. اهه حصل فى 3 شهور
يا جماعة أنا عاوز بجد اباركلكم لو هى دى بس مكاسب الثورة يبقى ممتاز.. لو الثورة حققت ده بس يبقى احنا كسبنا كتير جدااا .. 
حتى الاولاد الصغار اللى مينفعش يصوتوا علشان سنهم راحوا مع أهاليهم علشان يلونوا اصابعهم بالحبر الفسفورى .. بنات و شباب رجال و نساء حتى العواجيز كان فيه ناس مش قادرين يمشوا جايين متسندين على الشباب!!! ايه ده؟
معقول يا جماعة احنا فى مصر؟ كل ده و تقوللى لسه انك خايف؟ بصراحة بعد اللى شفته امبارح ده انا مقبلش من اى حد يقوللى انه لسه خايف على مصر... الناس اللى خرجت بالملايين امبارح دول متأكدين ان مصر اتغيرت و ان بقالهم صوت فى البلد هم نفسهم اللى هيغيروا مصر و هيخلوها تتقدم، الناس دول هم اللى هيقفوا لاى حد يحاول يمس مصر بسوء ... الناس اللى لونت صوابعها امبارح بالحبر الاحمر مستعدين يلونوا نفسهم بدمهم الاحمر فداء لمصر..
بعد ما شفت امبارح الغفير واقف فى الطابور مع الوزير بعد ما شفت الناس كلها بقت سواسية مبقتش خايف على مصر.. 
مصر فيها كوادر تقودها يا جماعة انها تكون قوة عظمى فى العالم .. فكر فى العلماء المصريين اللى نجحوا فى امريكا و فى اوروبا و فى دول الخليج كل دول فى زيهم بالالاف فى مصر . فكر فى الادباء و المشايخ و رجال الدين و رجال السياسة .. فكر فى نفسك انت هتلاقى انك متميز لانك مصرى..


انتهت المحنة يا شعب مصر و اخدنا ثقة كبيرة جدا فى نفسنا و عرفنا ان بعد ما كان الناس كلهم يائسين من أحوال بلدهم رجعلهم الأمل و مستعدين يعملوا اى حاجة علشان ينجحوها ... 
انا دلوقتى مش خايف من فلول الحزب الوطنى و مش خايف من البلطجية و مش خايف ان الاخوان يسيطروا على مجلس الشعب و مش خايف من الثورة المضادة و مش خايف من ابو رجل مسلوخة....
بعد اللى شفته امبارح انا خايف بس ان الحبر البمبى يخلص ...