WNR

WNR
World News Reader

الثلاثاء، 14 ديسمبر 2010

أن تكون مهندس كمبيوتر

 أن تكون مهندس كمبيوتر

بقلم: محمود عبد الحفيظ 



ان تكون مهندس كمبيوتر  فى شركة فستكون حياتك كالتالى


سيرتبط اسمك فى الشركة دائما بالمشاكل ، لان الناس ستتصل بك عندما تحدث مشكلة فى الكمبيوتر الذى اصبح عصب معظم الشركات فستجد الاتصالات دائما مصطحبة بمشاكل  الكمبيوتر او الشبكة او البرامج لتجد نفسك فى النهاية راجل بتاع مشاكل


ستجد نفسك مطالبا بحل الازمات المنزلية ايضا لموظفين الشركة و ليس مشكلات العمل فقط فستجد من يتصل بك ليلا ليؤرق نومك لان زوجته مثلا لا تستطيع محادثة اختها على الانترنت او من يتصل بك و انت فى بيت الراحة ليسألك ما هو احسن مضاد للفيروسات يمكن ان يستخدمه و اجابتك طبعا سيأتى بعدها رد طبيعى ممكن تجيبهولى؟
طبعا ده غير اللى هيكلمك يقولك معندكش برنامج افتح المواقع المحجوبة و لو قلت لا لانك بتخاف انه يستخدمه فيما يغضب الله  يبقى انت مبتفهمش حاجة و مهندس كمبيوتر فاشل اما اللى هيطلبوا منك برامج دينية فهم قليلين جدااا


مهندس الكمبيوتر هو من المهن القليلة المطالب صاحبها ان يتحدث فى العمل ليل نهار فانت تتحدث فى العمل و انت فى شركتك وانت فى البيت و مع اصحابك و مع معارفك الخ..
طبعا ناهيك عن الاسئلة الغريبة و التى يجب ان يكون ردك عليها قاطع لا يعطى فرصة لصاحبها ان يسأل اسئلة اخرى مثل ما هو افضل لابتوب؟ ما هو افضل برنامج ؟ و المفروض طبعا انك تكون سايب شغلك و كل حاجة و قاعد بس تعمل مقارنات بين اللابتوبات و اجهزة الكمبيوتر و البرامج علشان تجاوب على هذه الاسئلة العبقرية 


بالنسبة لعملك طبعا فانت دائما فى ضغط عصبى مستمر فدائما انت فى مشكلة تحاول ان تجد لها حلا خاصة ان المستخدم  يكون اغلب الوقت فاضى و عندما تحدث مشكلة فى جهاز الكمبيوتر عنده يتصل بك كل 5 دقائق ثلاث مرات و يعطيك كلام من عينة "عندى شغل مهم لازم يخلص دلوقتى" الخ..
طبعا اى واحد فى الدنيا ممكن يغلط فى شغله اما مهندس الكمبيوتر حتى و ان كان عبقرى و حل مشاكل كثيرة جداا فعندما يقع فى غلطة واحده يقال عنه انه لا يفهم شىء على الاطلاق
و طبعا ستكون دائما محل اتهام فأنت السبب فى بطىء جهاز الكمبيوتر و أنت السبب فى بطىء الانترنت و انت السبب فى ان موقع الفيس بوك مش شغال


اذا حدثت مشكلة فى النظام فى الشركة او دخل فريوس على الشبكة مثلا فانت مطالب انك متروحش بيتك حتى تنتهى المشكلة حتى لو استغرقت اسبوع بعكس اى موظف اخر

لو كان شغلك مرتبط بأى عملية انتاجية فانت المتسبب فى اى عطل او توقف للعمل لان ببساطة الموظف سيقول السيستم عطلان حتى و ان كان هو الذى لا يريد ان يعمل

لو مدير الشركة اشترى جوال جديد فطبعا انت مسؤول انك تعرف كل مميزاته و تفهمهاله كلها و لو لم تفعل فانت مهندس فاشل
 
و طبعا لو فيه واحد عامل نفسه فاهم فى الشركة و دخل مثلا على موقع انت متعرفوش هيذلك قدام الناس كلهم و يقول انه بيفهم احسن منك 
او تلاقيه يشوف على النت فيديو كيفية كسر كلمة السر فى الويندوز فيتصل بيك الساعة 3 صباحا و يقولك "باركلى مش انا بقيت هكر" !!
و طبعا مع كل انجاز ليه بيحكيهولك انت لازم تحسسه انه فاهم و جاب التايهة مش تحسسه ان ده شىء عادى و موجود لاى شخص على الانترنت

اذا اخترت ان تكون مهندس كمبيوتر فعليك ان تتوقع هجوم الناس عليك و نقدهم و عليك ان تتحمل القلق الذى سيحدث لك  فى اى ساعة مبكرة او متأخرة من اليوم 


باختصار ان تكون مهندس كمبيوتر ستجد حياتك مليئة بالفيروسات و ملفات التجسس