محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

السبت، 2 أبريل، 2011

تويتات صعيدية سياسية شحط محط

بقلم : محمود عبد الحفيظ

قبل اى شىء أنا صعيدى و بعتز بكده و دى شوية تويتات صعيدية سياسية شحط محط ....



الناس اللى كانوا بيقولوا كفاية حرام خلى الناس اللى فى التحرير تمشى و ادوا الحكومة و الجيش فرصة و لو ملقيتوش نتيجة ارجعوا تانى ماهو التحرير اهه مش هيطير .... امبارح لما الشباب رجعوا التحرير علشان حسوا ان مفيش نتيجة الناس دول زعلوا و قالوا ايه اللى رجعهم التحرير تانى ؟ 
الله مش ده كان كلامكم؟؟!!!


متستغربش خالص لو فتحت الاون تى فى و لقيت خبر بيقول "صرح مصدر مسؤول ان زلزال مصر حدث بسبب السلفيين" او انك تلاقى اتصال هاتفى بالقناة من شاهد عيان بيقول "انا شفت بعينى دلوقتى واحد سلفى ماشى فى الشارع و بيطلع نار من بقه" عادى جدااا 
مع تحياتنا للاعلام الحر و لنجيب سويرس


كنت قاعد بقلب فى صفحات الفيس بوك علشان الصفحة اللى كنت تانيها البت بنتى قطعتهالى فقلت اشوفلى صفحة اشخبط فيها شوية .. بليت صباعى و قعدت اقلب لغاية اما وقعت على صفحة "انا اسف يا ريس" لقيت اول خبر مكتوب فيها  "من نتائج ثورة 25 يناير خروج مصر من تصفيات الامم الافريقية" رديت عليهم بتعليق كان نفسى اكتبه بالقلم الجاف علشان ميتمسحش قلتلهم "اول مرة اعرف ان الريس كان بيلعب فى المنتخب و لما خرج منه اتغلبنا عموما ملحوقة لو ضمنتولنا ان الريس لو رجع هناخد كأس العالم ......... برضه مش هنقول اسفين يا ريس"


امبارح كان فيه فى مصر زلزال فقعدت افكر مين السبب فيه "فلول امن الدولة" ولا "فلول الحزب الوطنى" ولا فلول النظام السابق" ولا "فلول الاعلام الفاسد" ولا "فلول الاخوان و السلفيين" ولا "فلول و طعمية" و لا "فلول اليابان" و فى الاخر طلع مفيش زلزال ولا حاجة ده الواد ابن اخت عفاف شعيب كان بيتكرع بعد البيتزا و الريش .....


رساله مهمة جدااا الى كنتاكى "زود السلطة يا اخى شوية ده احنا بقينا زباين عندك مش كده" وياريت توزع بعد كده مع الوجبات الكومبو بدل الحاجة الساقعة ازازة بنزين لزوم المولتوف علشان نعرف نحبس....

الله يمسيك بالخير يا يوسف بطرس غالى لو كنت موجود دلوقتى كنت خدت ورك فرخة ضريبة على كل وجبة كنتاكى و كان زمانك لميت شوية وراك حلوين دلوقتى بس يلا مش مشكلة ما انت مهيص بالارانب اللى قلبتها فى لندن اهه...


الناس محتارة ترشح مين لرئاسة الجمهورية : ففكرت هو قبل ما نختار الشخص لازم نعرف هو رئيس الجمهورية بيعمل ايه الاول علشان نختار شخص مناسب فلقيت ان رئيس الجمهورية مبيعملش حاجة غير انه لو حصلت اى مشكلة يطلع يقولنا خطبة متينة مضمونها هو نفس مضمون الخطب اللى بنسمعها بقالنا 50 سنة فقلت يبقى انسب واحد يمسك رئيس هو شعبولا حبيب الكل هيسجلنا خطاب بنفس اللحن كل ما تحصل حاجة نشغله و نريح نفسنا و ايييييه ايييييه....


فيه تويتاية رخمة عمالين يقولوها عن الصعايدة اليومين دول ... قال ايه الصعايدة طالعين الجمعه الجاية بمظاهرة بيطالبوا الرئيس بالتنحى ... و نازلين تريقة على الصعايدة فيه ايه يا جماعة مش كده احنا الصعايدة اجدع ناس .....
و متحاولوش تقللوا من شأن الصعيد احنا فاهمين كل حاجة و عارفين ان الرئيس مش ممكن يتنحى طبعا !!!! ....


بالنسبة لصفحة "كلنا خالد سعيد" احنا فى الصعيد معترضين عليها لان الصعيد هى قلب مصر مش الاسكندرية و لازم اللى حصل ده يكون من قلب مصر لذلك قررنا اننا هنقتل الواد مخيمر ابن عم بسطاويسى بتاع الجلة و نحطله فى بقه شوية جلة و نقول انه انتحر بعد ما اكل الجلة علشان ملقاش حاجة يحبس بيها و هنعمل صفحة "كلنا مخيمر ابن عم بسطاويسى بتاع الجلة" .....

عمالين يا خويا يقولولنا اليومين دول ان مبارك ممنوع من السفر خارج مصر و انه تحت الاقامة الجبرية  طيب انا بس ليه رأى صعيدى فى الموضوع ده ... هو مبارك فين دلوقتى؟ بيضحكوا عليكم و يقولوا مبارك فى مصر؟ مبارك مش فى مصر مبارك فى شرم الشيخ... طبعا هيجى واحد ذكى يقوللى طيب ماهى شرم الشيخ فى مصر هقوله انا بقى ان هى دى الخدعه يا حلو ... احنا الصعايدة مينضحكش علينا واصل .. هاتلى دليل واحد ان شرم الشيخ مصرية!! تقدر تدخل جيشك سيناء و توديه شرم الشيخ؟ لا .. تقدر تسافر كده منك لنفسك شرم الشيخ من غير ما حد يفتشك و يشوف بطاقتك و ينزلك على الكامين و يتحرى عنك ده لو اصلا مرجعكش و قالك ممنوع تدخل؟ .. جرب روح شرم الشيخ و شوف انت كمصرى هتتعامل ازاى و الاجانب جنبك بيتعاملوا ازاى ... تجربة شخصية من صعيدى عاش فى شرم الشيخ 6 سنوات دى مش بلدنا يا جماعة كل الموضوع بس اننا مسموحلنا ندخلها فقط من غير جواز سفر ...


عندى بس كلمة عاوز اوجهها لفنانين مصر اللى كسفونا ايام الثورة و طبعا هم عارفين نفسهم .... هو ليه الواحد ميحترمش نفسه و لو حس انه مش فاهم حاجة يسكت و يريح و يستريح؟؟ ليه مش مقتنعين ان الواحد محاسب على كلامه من الله قبل الناس؟ اذا كنت انت فنان و بتقول كلام و انت مش فاهمه انت ببساطة هزيت صورتك قدام الناس كلها و فقدت شعبيتك و حتى لو رجعت اعتذرت خلاص الناس بتقدر بس اللى بيقف معاهم فى شدتهم و انتو خلاص اختارتم فى الاول مصلحتكم و افتكرتوا انها هتكون مع الرئيس السابق بترجعوا ليه فى كلامكم دلوقتى ؟؟!! مع تحياتى لطباخ الريس و بقيت طقم الخدامين..!!




توقيع : صعيدى من مصر

هناك تعليقان (2):

  1. احمد الهاشمي20 أبريل، 2011 2:28 م

    السلام عليكم
    اخي الحبيب ....امل منك التركيز علي الاهتمام بالصعيد
    الذي اهمل لفترة طويله من النظام السابق ....ولنتجاوز
    موضوع المحاسبه مع النظام السابق طالما الاجراءات مستمره
    وتحياتي لكل اهلنا في مصر والصعيد خصوصا...

    ردحذف