محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

الأربعاء، 8 ديسمبر، 2010

من انهاردة مفيش فيس بوك انا الفيس بوك انا الفيس بووك

من انهاردة مفيش فيس بوك - انا الفيس بوك انا الفيس بووووووك

بقلم محمود عبد الحفيظ

يا جماعه هو ايه علاقة الفيس بوك بالحكومة ؟ اعداء ولا اصحاب ولا ايه حكايتهم بالظبط
الاول طبعا كلنا سمعنا الاشاعة بتاعت ان الفيس بوك ده اسرائيلى و بيستخدموه اليهود علشان يتجسسوا علينا و بصراحة مكنتش مقتنع اوى اصل اليهود هيتجسسوا على ايه يا حسرة ما هى البلد باينة من غير تجسس ولا يحزنون 
المهم فضلت ادور ورا الموضوع ده شوية و اكتشفت ان الفيس بوك ده اللى عملوه اصلا شوية عيال امريكان فى الجامعه صايعين موراهمش حاجة
اصل طبعا فيه فرق بين شبابنا و شبابهم هم يا عينى شبابهم لما بيصيع بيخترع حاجة زى الفيس بوك و كده انما احنا العرب و بلا فخر طبعا اللى بنعرف ازاى بقى نستخدم الحاجة اللى اخترعوها شوية العيال الصيع دول صح - فتلاقى بقى الفضايح بانواعها اللى مصور زميلته فى الجامعه و معدل على صورتها بالفوتوشوب علشان تبقى فى وضع مش كويس و اصحابه يقولوا عليه واد من الاخر و اللى مصور جارته و اللى مصور واحدة ميعرفهاش ماشية فى الشارع الخ.... احنا بتوع الفضايح مش تقوللى نعمل فيس بوك وكلام فاضى
المهم سمعنا بعد كده ان مصدر اشاعة ان الفيس بوك ده اسرائيلى هم الحكومة و ده لما شافوا الخطر اللى ممكن يعمله الفيس بوك  عليهم لانه بيجمع المعارضة ضدهم و بيطلع الفضايح بتاعتهم و كده فقالوا احنا نقول للشعب انه اسرائيلى يمكن يقاطعوه يعنى عملوا اجتماع كده زى اللى عملوه فى فيلم طباخ الريس و قالوا ان الشمس هتعمى الناس بس المرة دى الفكرة العبقرية ان الفيس بوك اسرائيلى
بس مجابتش نتيجة و الفيس بوك اشتهر اكتر و اكتر لدرجة ان بقاله نسبة حضور عالية جدا
و قت الانتخابات النزيهة و الشريفة الاخيرة دى الناس لاحظت حاجة غريبة جدا ان الحكومة مش معترفة تماما بالفيس بوك و فضايحه 
احنا شفنا فيديوهات غريبة عن الانتخبات من ضمنها فيديو الرجل الخفى و ده فيديو لراجل متصور بس وشه مش باين عمال يكتب ورق و يحط فى الصندوق يكتب و يحط و كأنه صندوق تبرعات و الاحلى من كده فيديو لذيذ قوى شفت ناس دخلو اللجنة و معاهم شوال اسود مليان ورق و راحو فاتحين الصندوق و فضوا الشوال كله فيه مش عارف ليه و قت الفيديو ده افتكرت الاعلانات بتاعت البلهاريسيا بتاعت  محمد رضا زمان هو و عبد السلام لما كان بيطمنه انه مش هياخد حقنه فكان بيقوله " العلاج دلوقتى بالكبسول مش بالحقن زى زمان" و كأن اعضاء الحزب الوطنى الموقر كانو خايفين المرة دى من الانتخبات لتكون نزيهة بجد فبيطمنوهم بالفيديو ده و بيقولولهم " التزوير دلوقتى بالشوال مش بالورق زى زمان" ده طبعا غير فيديوهات المجازر و السنج و السيوف و كأننا رجعنا لحرب الجاهلية تانى و كأنك بتتفرج على فيلم تاريخى فكنت متوقع و انا بتفرج على فيديوهات الانتخبات انى الاقى مثلا واحد بيجرى بحصان و ماسك فى ايده اسهم بيرمى بيها العدو " اللى هو الشعب يعنى "
طيب اذا كان العدو هو الشعب و الهدف من ورا الانتخبات تمثيل الشعب مش حاجة غريبة شوية كأنك جبت لفلسطين واحد اسرائيلى يمثلهم فى اجتماع الامم المتحدة صح؟ نفس الفكرة الناخب بيحارب الشعب و بيعتدى عليه علشان يمثله فى المجلس يعنى قمة الاخلاص و التضحية
المهم ان فى وسط ده كله تحس بقى بحاجة من الاتنين يا اما الحكومة معندهاش فيس بوك او ظروفهم وحشة يا عينى مش قادرين يشتركو مع الواد عبده بتاع السيبر و ياخدوا منه وصلة انترنت او انهم لما زهقوا خالص من موضوع الفيس بوك ده قرروا يعملوا زى قصة النعامة اللى بتدفن راسها فى الرمل لما تحس بخطر علشان متشوفوش او كأنك ماشى فى وسط الشارع لقيت اتوبيس جاى بسرعه هيدوسك فبدل ما تجرى من الخوف غمضت عنيك يعنى هو كده مش هيدوسك؟ اهه الحكومة عملت كده بالظبط قرروا انهم مش هيفتحوا اكونت الفيس بوك بتاعهم اليومين دول و يريحوا دماغهم و بكده مش هيشوفوا اى دليل على التزوير و يقدروا بقى براحتهم يطلعوا فى التلفيزيون و يقولوا ان الست نزيهة كانت موجوده فى الانتخبات مع انى اعتقد ان اللى كانت موجودة دى تفيدة مش نزيهة
و رئيس الحكومة طلع امبارح بيقول اتحدى اى واحد يجيب دليل على ان كان فيه تزوير طبعا "طبعا يا باشا مفيش دليل هو فيه حد يجرؤ يقول غير كده ده يروح ورا الشمس"  و اللى طلع و قال الانتخبات دى من نزاهتها هيسجلها التاريخ " يا باشا خللى التاريخ فى حاله خلينا احنا فى الجغرافيا احسن " و اللى قال ان شوية العنف اللى حصلوا دول حاجه بسيطة لا تذكر بتحصل فى اى دولة وقت الانتخبات حتى فى امريكا " رغم انى مشفتش امريكانى ماشى فى الشارع بسيف قبل كدة بصراحة "
و طبعا لازم تكدب عينك و تصدق السيد المسؤل دول هم الحكومة و الحكومة عارفين كل حاجة على رأى عادل امام
و و مش معقول هتكدب الحكومة و تصدق الفيس بوك ده حتى يبقى عيب عليك
و بعدين ازاى تفتح الفيس بوك اساسا و السيد المسؤول مبيفتحوش ده انت ناقص تعمله شير للفيديوهات بتاعت الانتخبات دى صحيح بجاحة والله

يعنى من الاخر يا جماعة  الحكومة صرخت باعلى صوتها و قالت من انهاردة مفيش فيس بوك انا الفيس بوك انا الفيس بووك


هناك تعليق واحد:

  1. فعلا صدقت يا استاذ فى كل كلمه قلتها فى هذا المقال

    ردحذف