محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

الجمعة، 25 مارس 2011

خطة خطيطة مخطوطة مخططة بالخطاخيط

بقلم : محمود عبد الحفيظ

بعد أن شاهدنا أمس ثلاثة محامين يطالبون ببطلان تخلى مبارك عن الحكم و بعد ان قرأنا كلنا تحقيق الاستاذ الكبير بلال فضل عن المخططات الاجهادية للثورة اعتقد ان الخطة الخطيطة التى تم رسمها من مبارك و جماعته واضحة ...
بص يا سيدى عندك اول حاجة تخلى مبارك عن الحكم و تسليم المجلس العسكرى زمام الامور و طبعا ده قرار فرح به الملايين و انتصرت الثورة امام العالم و لكن ......... 



بواسطة ظباط أمن الدولة "اكلى لحوم البشر" يبدأ الشغل الكبير ... بلطجة على نطاق واسع جدا فى البلاد مع اعطاء صلاحيات كاملة للبلطجية للتحكم فى البلد كيفما يشاءون مع زيادة الاشاعات عن الخطف و السرقة و الاغتصاب بحيث يشعر جميع المواطنون بالرعب الشديد و كأن الدولة بعد الثورة تحولت الى غابة ...
اشعال الفتنة الطائفية فى انحاء البلاد و زيادة الوقيعة بين المسلمين و المسيحيين لزيادة العنف و الذعر ...
الاغتيالات المعنوية لكل رموز الثورة مثلما وضح لنا الاستاذ بلال فضل مثلما حدث مع البرادعى و سيحدث مع غيره لاعطاء صورة سلبية لجموع المصريين عن هذه الشخصيات و بالذات المرشحة لكرسى الرئاسة .....
نشاط كبير على الانترنت و خاصة الفيس بوك للترحم على ايام مبارك و أيام الامن و الأمان اللى كانت فى عهد مبارك و كأن مبارك كان هو اللى بيخوف البلطجية فى الشارع بالليل ..... و طبعا مننساش فى النقطة دى المجهود الكبير اللى قامت بيه صفحة انا "انا اسف يا ريس" و امثالها و لسة هنشوف "حقك على راسى يا ريس" و "امسحها فية يا ريس" و "قلبى عندك يا سوزان يا اختى" ... و طبعا عمل اعلانات مدفوعه لها لزيادة انتشارها مع اشاعات ان مبارك مكتئب و لا يأخذ الدواء و الى اخره كما رأينا بالظبط .....
الحفاظ طبعا على القيادات الاساسية للفساد "صفوت الشريف" "فتحى سرور" "زكريا عزمى" لضمان الحفاظ على نقاط الرجوع و طبعا الحفاظ ايضا على رؤوس الاعلام الفاسد لتعزيز الخطة من الناحية الاعلامية و ممكن تشوف ده بسهولة فى جريدة الاهرام كل يوم مع اسامة سرايا فمثلا اليوم كان المانشيت الرئيسى فى الاهرام "مجموعة من المتطرفين المسلمين يعتدون على قبطى و يقطعون أذنه" !!
و البرامج اللى بنشوفها على قناة المحور و غيرها اللى بتحاول تبين السلبيات اللى فى الشوارع و تعمل مقارنات بين الشارع قبل و بعد الثورة...
طبعا بعد المشاكل دى كلها و مع شوية تحابيش زى بيع المخدرات فى الشوارع و الاسلحة اللى مع الناس كلها يبدأ الناس يقولوا "ولا يوم من ايامك يا ريس" و "مكناش بنشوف كده فى ايامك يا بعلى" و "مكانش يومك يا سبعى" و الكلام ده كله ....


و الطبيعى لما يبدأ النظر فى دعوى عودة مبارك و مع شوية تحابيش اعلامية ممكن تأثر على الناس الغلابة يبدأ التعاطف الشديد مع مبارك و تبدا المظاهرات التى تطالب بعودة مبارك و طبعا ساعتها هو هيتقل علينا و نتحايل عليه و نقوله طيب ارجع و نمشى احنا طيب ، ووسط هذا الضغط الجماهيرى الكبير لا يجد الرئيس اى حل غير انه ياعينى يرجع مضطر لكرسى الرئاسة مطالبا بمرتب شهرين و بدل سكن و بدل اكتئاب و بدل دواء و بدل صدمة نفسية و بدل رخامة و كفاية كده بدل ما اتشل..!!


انا حطيت تصورى للخطة الخطيطة اللى انا شايفها ساذجة جدا بس للاسف برضو شفت ان جزء كبير منها نجح فهل سنرى مبارك او نجله قريبا على الكرسى مرة اخرى اذا تم ذلك فانا اول من سيطلب اللجوء و لكن لن يكون لجوء سياسى سيكون لجوء لله هو اللى يقدر يريحنا.....

هناك تعليق واحد:

  1. هههههههههههههههههه والله هي فعلا خطه خطيطه ميطلعهاش غير حد صعيدي علي فكره انا صعيدي

    ردحذف