محمود عبد الحفيظ

محمود عبد الحفيظ
لو لم أكن صعيدى ... كنت هزعل اوى ... محمود عبد الحفيظ

Follow me on FB

الاثنين، 1 أكتوبر، 2012

حصريا : كواليس تنحى مبارك .. بالتفصيل " جديد "

حصريا قبل خطاب التنحى دار الاجتماع التالى :
مبارك : وبعدين يا جماعة شوفولى حل فى اللى بيحصل ده .. انا اصلا لم أكن أنتوى اتنحى دلوقتى خالص و يحز فى نفسى ان الواد جمال ميمسكش الحكم .. ما تشوفلى حل يا طنطاوى نزل الجيش اعمل اى حاجة ..

طنطاوى : انا مش فاهم هى الناس مبتشتركش ليه ماهو اللى عملوا الثورة دى مصريين يبقى كله لازم يشارك ..


مبارك : انت بتقول ايه يشاركوا اكتر من كده ؟؟

طنطاوى : لا انا اقصد الناس بتوعنا يعملوا اى حاجة فين الناس بتوعنا؟؟

مبارك : اه صحيح فين الناس بتوعنا ؟؟ فين توفيق عكاشة و اللى معاه ؟؟

توفيق عكاشة : ايوة يا باشا انا هنا .. معلش كنت بزغط بس البط برة و رجعت على طول .. اما انا بقى يا باشا جايبلك مفاجأة معايا الواد زبايدر و الواد عمرو مصطفى هيظبطولك الدنيا ..

زبايدر : أوكسمو بالله يا شعب انت ما عارف انت رايح على فين .. ازيك يا ريس متقلقش انا بس هطلع دلوقتى على الكوافير اعمل حواجبى و انزل الميدان اقنع الناس يسيبوه حالا .. اهه بيقولوا فيه شباب كتير هناك يمكن نعرف نصطاد واحد امور كده ولا حاجة .. 
عمرو مصطفى : بس يا زبايدر .. ايوة يا سيادة الريس متقلقش انا من امبارح سهران طول الليل بحل فى الغاز بيبسى و عرفت الواد اللى ملحن الاعلان بتاعهم بتاع عبر مين ادك اخيرا هعرف انتقم منه و متقلقش يا باشا انا سمعت عن حاجة اسمها فوتوشوب ممكن نقول للناس ان الفيديوهات بتاعت الناس اللى اتقتلت دى معمولة بيها ..


مبارك : انا مش مطمن يا طنطاوى تفتكر العيال دى ممكن تعمل حاجة؟؟ هو صحيح فين شفيق؟؟

شفيق : ايوة يا ريس انا هنا .. بص يا ريس انا بقول ان انت لو حاولت تعمل انهاردة فى صفك اللى معرفتش تعمله هيتحول مش فى صفك اكتر منه فى صفك .

مبارك : يعنى ايه الكلام ده انا مش فاهم حاجة يا شفيق . يعنى ايه ؟؟

شفيق : انا اقصد ان الثورة دى مبررة ولا مش مبررة؟ لو مبررة تبقى مبررة لو مش مبررة متبقاش مبررة 

جمال مبارك : رد عليه انت يا حسين

طنطاوى : بص يا ريس زى ما قلتلك لازم الكل يشارك هى الناس مبتشاركش ليه؟ احنا ننزل بالبلطجية بتوعنا و الجمال يفضوا الميدان .. ايه رأيكم ؟؟

فتحى سرور : الموافق على البلطجية و الجمال يتفضل برفع يده .. موافقة

عمر سليمان : اوك مفيش غير البلطجية بط هوين ؟

جمال مبارك : رد عليه انت يا حسين

صفوت حجازى : عندما سمعت ان الجمال و البلطجية سينزلوا ادركت ان الاسلام دخل ميدان التحرير

مرتضى منصور : متقلقش يا ريس البلطجية موجودين و انا مجهز السيديهات .

احمد شوبير : لييييييييييييييييييييييييه سيديهات لييييييييييييييييييييييييييييه

مبارك : انتوا هتودونى فى داهية و شكلكوا هتخلونى انتوى التنحى و انا مش منتويه حرام عليكم

جمال مبارك :هنروح فى داهية؟؟  رد عليه انت يا حسين

العادلى : الجمال نزلت يا ريس و كله تمام بس العيال اللى فى الميدان ضربوهم  و رجعوهم تانى يا فندم .

مبارك : ضربوهم و رجعوهم و انت كنت فين يا عادلى؟

العادلى : انا كنت بجهز البرنس فى الحمام يا ريس علشان جايلى مزة انهاردة

جمال مبارك : جايلك مزة؟؟  رد عليه انت يا حسين

مبارك : طب و بعدين كده مفيش حل غير التنحى و انا مش منتوي دلوقتى و يحز فى نفسى اوى .. اهىء اهىء

عمر سليمان : اوك مفيش غير التنحى بط هوين ؟

طنطاوى : فعلا كده مفيش غير التنحى بس هى الناس مبتشاركش ليه فى التنحى كله لازم يشارك 

جمال مبارك :مفيش غير التنحى؟؟ طب رد عليه انت يا حسين

مبارك : خلاص مفيش حل تانى يا جماعة قولولى اى حاجة تانية

فتحى سرور : الموافق على التنحى يتفضل برفع يده .. موافقة 

شفيق : ايه ؟؟

صفوت حجازى : عندما علمت بالتنحى ادركت ان الاسلام دخل القصر الجمهورى

المرشد : التنحى بالحب و كله بالحب

شفيق : التنحى ده مبرر و لا مش مبرر؟؟؟

احمد شوبير : ليييييييييييييييييييييه ليييييييييييييييييييييييييييه

مرسى : انا مش لابس قميص واقى 

مبارك : لم اكن انتوى خالص حرام عليكم يحز فى نفسى اوى اهىء اهىء

جمال مبارك : رد عليه انت يا حسين

شفيق : ايه؟؟

الراجل اللى ورا عمر سليمان : معنديش حاجة اقولها يا ريس لا تعليق لا تعليق

طنطاوى : خلاص يا ريس عمر سليمان اذاع خطاب التنحى و احنا اللى حمينا الثورة .

شفيق : ايه؟

طنطاوى : انا بصراحة مش فاهم الناس مبتشاركش ليه كله لازم يشارك 

مرسى : خلاص يا جماعة لازم نمشى دلوقتى و نطلع على الميدان و على فكرة . انا مش لابس قميص واقى

المرشد : يلا يا ولاد انزلوا الميدان علشان تلحقوا تركبوا الثورة و متنسوش دعاء الركوب

طنطاوى : احنا اللى حمينا الثورة و كله لازم يشارك فى الركوب

شفيق : ايه؟

مبارك : خلاص يا طنطاوى كل حاجة باظت انا هنتوى اطلع شرم دلوقتى اقعدلى يومين يحز فى نفسى هناك شوية انا و العيال

طنطاوى : اتفضل يا ريس ماهو كله لازم يشارك فى الحززان و احنا اللى حمينا الثورة

شفيق : ايه؟؟؟؟؟

ليست هناك تعليقات:

إرسال تعليق