مش سالف قوي يعني، الكلام ده كان في
أواخر الخمسينات أوائل الستينات، الدولة بنت مصنع لإنتاج الكراسي على
الحدود بين دولتي إمبابة والوراق يطل على
النيل مباشرة. وروحي يا أيام، تعالي يا أيام، وزي كتير من المصانع اللي زيه، المصنع ما
بقاش له عازة (لو كنت من محبي ناصر هتشوف إن ده بسبب المؤامرة على القطاع
العام والصناعة المصرية، ولو كنت من كارهيه هتشوف إن أصلا مكنش له عازة وإن
خسر البلد كتير أو إدارته كانت فاشلة، بس مش ده موضوعنا)
لما المصنع مابقالوش عازة، باعوه، وفضل كده مساحة أرض مهجورة، بس مساحة
عملاقة، ييجي بتاع خمسين فدان.
طبعا المساحة الضخمة دي، خلت المنطقة اللي وراه، مرتع لكل حاجة، ضريبة
الحقن، شمامين الكلة، وأي اتنين مش لاقيين شقة. بمرور الوقت بدأ سكان المنطقة يستخدموا تعبير "ورا مصنع الكراسي" كناية عن
"السيكو سيكو".
وكعادة الشعب المصرى العظيم اصبحت الشتائم متداولة باستخدام المصطلح الجديد : "خدتك ورا مصنع الكراسي"، "إنت بتتاخد ورا مصنع الكراسي"، "بياخدها
ورا مصنع الكراسي"
وهكذا.
فضل التعبير محصور في نطاق إمبابة والوراق .. لحد ما جه ممثل مصري اسمه أحمد
مكي، اخترع شخصية اسمها حزلئوم.... ساكنة في منطقة شعبية، فاستعار التعبير في
فيلم من أفلامه.. وهكذا خرجت العبارة من النطاق الإقليمي للحي الشعبي، وشملت
النطاق المحلي لجمهورية مصر العربية. و اصبحت الجملة اكثر شعبية خصوصا فى مواقع التواصل الاجتماعى ... ناخد طيارة ونطلع على ألمانيا، فريق بايرن ميونيخ يعلن برنامج لقاءات
للفترة المقبلة، ومنهم ماتش مع نادي مصري هو النادي الأهلي. ييجي مشجع مصري واخد الاصطباحة، يروح كاتب لهم بالإنجليزي، we will take
you behind the factory of the chairs.
المشجع ده ياخد عدد مهول من
اللايكات، طبعا من المصريين اللي بيتابعوا صفحة البايرن. أدمين الصفحة الرسمية للنادي الألماني لما يشوف اللايكات دى كلها يسأل: يعني إيه يا جماعة الكلام ده؟
شفرة دي ولا إيه؟
فالمصريين شرحوله المعنى. قوم إيه، بايرن ميونيخ يلاعب الغريم الألماني بتاعه بروسيا دروتموند
ويهزمه، فالصفحة الرسمية للبايرن تكتب بالإنجليزي: إنهم خدوا روسيا ورا
مصنع الكراسي. PS : factory of the chairs ......
ومين عارف، ممكن عقبال ما نوصل كأس العالم، مصنع الكراسي يبقى أشهر مكان
بالنسبة لجمهور الكورة. و هذا ما يسمى بتبادل الثقافات .. :D
كم انت عظيم ايها الشعب المصرى
تفتكر لو عبد الناصر وهم بيفتتحوا المصنع ده، حد قال له مصيره، كان رد فعله
هيبقى إيه؟
الوضع القائم فى مصر الان و مستوى الاخلاق .. اسف اقصد "اللاأخلاق" .. يدل على ان من يحكم مصر فعلا هو فكر السبكى
عندما تسير فترى ان البلطجة و قلة الأدب و سب الدين و الشتائم هى اللغة السائدة فى الشارع تقدر تعرف ان السبكى نجح فى ان يحكم البلاد و يغزوها فكريا ..
السبكى ليست شركة انتاج ولكن أسلوب حياة .. أسلوب "اى حاجة تجيب فلوس دوس فيها" .. اسلوب "اديك فى الجركن تركن" حلوة تنفع مطلع اغنية اسلوب طالما "السرسجية" بيدفعوا و هيكيشونا يبقى دوس يا برنس" اسلوب صافيناز الرقاصة هتجيب فلوس بالهبل يا معلم "ايوة كده يا وديع" السبكى لغة اصبحت هى اللغة الاولى الدارجة فى الشارع رغم انها مش مفهومة .. لغة "ماتيجى و نجيب مليجى" .. لغة "العفشة قفشة و بنكح تراب" لغة المهرجنات و الاغانى اللى مش مفهومة .. لغة "هاتى بوسة يا بت " و "الشبشب ضاع"
ياااه فين يا عم ايام الزمن الجميل ايام افلام اللمبى و الفن المحترم .. ياااه كانت ايام
ولا عوكل و بوحة "صبح صبح يا عم الحج" كنا فاكرينها قلة ادب و بنقول ايه الانحطاط ده بس بالنسبة للى بنشوفه دلوقتى تعتبر قمة فى الادب ...
هو انا صاحى اصلا ولا نايم و بحلم؟؟ ايه اللى بيحصل فى البلد ده؟؟ ايه اللى احنا وصلناله ده؟؟ انا بقيت اسمع كلام من البنات مكنتش بسمعه من اصحابى الولاد زمان !! العيال الصغيرة فى الشوارع بتشتم و تسب بعلو صوتها عادى خالص و قدام اهاليهم كمان .. و احنا زمان كنا بنخاف نعللى صوتنا بس واحنا بنلعب كورة لحسن اهالينا يطلعونا من وسط الماتش!! و تيجى تكلم عيل تلاقى العيال كلهم اتلموا عليك و مفيش اى احترام لاى حد كبير فبالتالى بقى كل واحد يخاف ينصحهم ولا يقولهم حاجة لحسن يقل من نفسه !!! العيال بقت بتشتم الناس الكبيرة عادى .. و احنا لما كان ابو واحد من اصحابنا بس يعدى كنت تلاقينا كلنا متسمرين فى اماكانا محدش يفتح بقه!!
العيال الصغيرة بقت بتشرب بانجو و حشيش و بيتباهوا بكده و الكبار بيبصولهم بحسرة و محدش عارف يتدخل.. لما تلاقى راجل كبير قد ابوك بيقول لعيال بتشتم بعضها فى الشارع عيب كده يروحوا شاتمينه هو كمان !! تقوله معلش يا حاج حق علية يقولك بحسرة عيال صغيرين هقل نفسى معاهم يعنى؟؟ بجد تتحبس جواك الدموع و متبقاش عارف تعيط على الاطفال و اللى حصلهم ولا على الكبار و قلة الاحترام اللى بيواجهوها ولا على الاخلاق اللى ضاعت .. تدور وشك الناحية التانية .. تلاقى اعلان صافيناز الرقاصة فى وشك و جنبه اعلان محمد رمضان ماسك مطواة!! و تيجى تتكلم يقولك ده فن .. و تعترض عليهم يقولك دول فنانين يعنى صفوة المجتمع .. هو فين المجتمع ده؟؟ هو احنا بقى عندنا مجتمع؟؟ احنا فين يا جدعان و لما دى اخلاق صفوة المجتمع المتعلمين امال اخلاق مسجلين الخطر عاملة ازاى؟؟ لما احنا جيل اتربى على "يوميات ونيس" و "ليايى الحلمية" و "الشهد و الدموع" و المسلسلات الجميلة دى و وصلنا اننا نشوف اللى بيحصل دلوقتى امال بعد 10 سنين جيل السبكى هيشوف ايه؟؟ يعنى الجيل اللى بعد جيل السبكى ده هيبقى ايه؟؟
هل فيه انحطاط اخلاقى ممكن نوصله اكتر من اللى احنا فيه ده؟؟ هل فيه اسوء من كده؟؟
هل فيه اسوء من ان بنت ماشية سواء كانت لابسة عادى او محترمة او محجبة او منقبة مش مأمنة على نفسها و بيتحرشوا بيها لفظيا و جسديا؟؟ هو فيه اسوء من انك تكون مش حاسس بأمان على اختك و مراتك و تبقى خايف و مرعوب انها تمشى لوحدها؟؟ هو فيه اسوء من انك تحس انك مش قادر تحمى أهل بيتك و من مين من شوية عيال؟؟ و بالنسبة لاسوء و افشل ناس فى الدنيا .. وزارة "انعدام التربية واللا تعليم" مش حاسين باى مسؤولية خالص قدام غزو السبكى؟؟ مش فالحين فى اى حاجة غير انهم يشغلوا اغنية "تسلم الايادى" و يخلوا الطالبات يرقصوا عليها؟؟ مش حاسين انكوا فى موضع مسؤولية عن جيل بناتكوا هيكونوا اول ضحاياه؟؟ مش حاسين بغيرة على ولادكوا؟؟ مش حاسين انكم الجهة الاولى اللى المفروض تتصدى للغزو ده ؟؟ ولا انتوا كمان وصلتلكوا لغة السبكى بدل اللغة العربية و بقيتوا تقولوا "نفض يا عم" احنا مالنا .. "اعمل من بنها" ؟؟ طالما مش هيأثروا على الدروس الخصوصية و المصالح يبقى "فكك" ؟؟
طب و "اللارقابة" اللى بيوافقوا على الافلام دى طبعا قابضين كويس و السبكى مظبطهم فمش محتاجين يتكلموا فى حاجة.. ماهو متقنعنيش ان انت هتكون انسان عاقل شغال فى الرقابة على الافلام و هتوافق على الاسفاف ده من غير ما تكون قابض !!
طب وانت ياللى قاعد بتقرا الكلام ده دلوقتى .. بزمتك مش حاسس انك عاوز تعيط على الحال اللى وصلناله؟؟ مش حاسس انك عاوز تبكى على الغزو و الافكار الغريبة اللى بيروجها لاطفالنا جاهل زى السبكى و شوية بلطجية و رقصات؟؟ بزمتك و انت ماشى فى الشارع فى العيد و شايف العيال الصغيرة بتتحرش بالبنات و بيشربوا مخدرات مبيبقاش نفسك تصرخ من جواك و تقول "يسقط يسقط حكم السبكى"؟؟ قلبك مبيصرخش و ينط من مكانه و يهتف "لو كان السبكى رجلا لقتلته" .. :| مبتنتفضش على الاخلاق اللى ضاعت حتى بينك و بين نفسك؟؟ مبتلومش نفسك لما بتنساق مع الموجه و تفقد اخلاقك شوية علشان تعرف تعيش و تقول اصلنا مش هينفع نعيش دلوقتى الا بقلة الادب .. لو لسة بتلوم نفسك يبقى فاضل شوية الحقهم قبل ما السبكى يجرفهم بجرافته قبل ما تصحى تلاقى نفسك بقيت من فلول السبكى و بتهاجم اى حد بيهتف "يسقط يسقط حكم السبكى" .. صعيدى من مصر محمود عبد الحفيظ
تطور الانسان المصرى كثيرا فى السنوات القليلة الماضية و خاصة بعد ثورة يناير المجيدة .. فأصبح يعتاد على المصائب الواحدة تلو الاخرى و يتقبلها بصدر رحب .. بمعنى اخر اصبح "جلده تخين" و بعد أن كان مقتل شخص واحد كخالد سعيد يعتبر صفعة قوية على وجه الشعب الذى انتفض جراء القتل الوحشى لهذ الشاب و اصبح مقتله هو حديث الساعة حتى قامت الثورة و التى كان مقتل ذلك الشاب من اهم اسبابها .. أصبحنا الان نقرأ أخبار عن مقتل العشرات يوميا و ربما بطرق ابشع و لكننا لم نعد نهتم .. فقد أصبح "جلدنا تخين" و لا تؤثر معنا حوادث القتل و التمثيل بالجثث ... لم نكتفى بذلك و لكننا أصبحنا نفرح ايضا بالقتل طالما من يتم قتله هو من معسكر لا نتفق معه سياسيا .. و نقول بكل زهو "يستاهل" ..
لم نعد نفكر فى نكبة اسرة او أم فقدت ابنها او عائلها .. أصبحنا نفرح بمقتل شخص اذا كان ليس متفق معنا فكريا حتى نثبت فقط صحة وجهة نظرنا ..
أما اذا قتل شخص من معسكرنا الفكرى و متفق معنا سياسيا فنصرخ لننادى الناس ليروا كيف يتم قتلنا بوحشية .. و الحقيقة أننا لا نصرخ لارتكاب جريمة قتل و انما أصبح المقتول سلعة نتاجر بها لنظهر للناس بشاعة القاتل و اصبح صراخنا على المقتول كصوت البائع الذى ينادى على بضاعته فى الشارع ليجذب الناس ..
مقالى هذا لا يستثنى أحد و لا ينحاز لفريق و انما أتحدث عن واقع .. جرب لمرة واحدة تخرج خارج صندوق عقلك المغلق و تفكر بطريقة مختلفة .. حاول أن تضع نفسك مكان الاخر حتى لو كنت تكرهه .. حاول ان تتجرد من طريقة تفكيرك و تتمرد على عقلك و لو لمرة واحدة و انظر الى اين نتجه ..
تقسمت مصر للاسف الى فريقين .. كل منهم يكره الاخر و يتمنى له الهلاك حتى انه يتمنى التدخل الاجنبى فى مصر طالما فى صالحه ..
نروج لاغانى و مصطلحات غريبة لو كنا سمعناها بالامس القريب لانكرناها بشدة كالاغنية الطائفية "احنا شعب و انتوا شعب" !!!
فكر قليلا ماذا يمكن ان يحدث اذا استمر الشحن بهذه الطريقة من الطرفين؟؟ فكر
فى التطور الطبيعى لهذه العلاقة العدائية بين الطرفين .. ماذا يمكن ان
يحدث اذا استمر الشحن و الضغط لمدة سنة اخرى و كيف سننتهى؟؟ متستغربش و
تستبعد فكرة الحرب الاهلية لانك من سنة واحدة مكنتش ممكن تتخيل الوضع اللى
وصلناله دلوقتى فبالتالى مش هتقدر تتخيل الوضع اللى هنوصله بعد سنة لو
فضلنا كده !! بلاش كل ده .. و سيبك من جيلنا تماما فقد تدمر و تشتت خلاص .. فكر ماذا فعلنا باطفالنا و صغارنا .. فكر قليلا خارج الصندوق و لا تقيس الامور بمداركك فالطفل ينشأ كما ربيته و ليس كما تتمناه ان يكون ..
احنا يا سادة خلقنا للاسف جيل مشوه .. الجيل القادم منقسم اكثر مننا بكثير .. لقد علمنا أطفالنا الكره قبل ان يعرفوا معناه .. علمناهم الغضب و البكاء وقت كانت ابتسامتهم تملأ الدنيا ..
نصف جيل اطفالنا الان يكره جيش بلاده و يتمنى له الهلاك و لا مانع عنده من التدخل الاجنبى فى مصر حتى يخلصه من جيش بلده .. النصف الاخر أصبح يكره الشيوخ و يسبهم و يرى ان كل صاحب لحية شيطان و لا مانع من قتله ..
الكثير من الاطفال فقدوا أبائهم فلا تنتظر ان يحبوا قاتلهم يوما .. الكثير من الاطفال نشأ على الغل و الحقد الكراهية الان فلا تتوقع منهم ان يحبوا بعضهم فى المستقبل ..
فكر فى مستقبل مصر مع جيل تربى وسط هذا الزخم السياسى و الكره و البغضاء .. فكر فى مستقبل مصر مع جيل تربى على أفلام السبكى ..
للاسف و بدون أن نشعر اقحمنا اطفالنا و مستقبلنا فى لعبة السياسة القذرة فلا حاضرا أصلحنا ولا مستقبلا ننتظر .. احنا سقفنا لاطفالنا و هم بيشتموا الكبير لمجرد اختلافنا معاه فلا تتوقع ان يكون جيل محترم ..
أسف من الفكر التشاؤمى و لكنى لا أحب ان انظر تحت قدمى حتى ارتطم في الحائط .. و اذا كنا قد اخطأنا فى حق اولادنا أفلم يحن الوقت ان نصلح ما أخطأنا فيه و نحاول جاهدين تغيير فكرهم الى الافضل ؟؟ ألم يحن الوقت لنزع بعض الكراهية من قلوبهم الصغيرة و زرع الحب ؟؟ ألم يحن الوقت أن نعلمهم ما لم نتعلمه نحن و هو فن الاختلاف؟؟
و بالنسبة لوزارة التربية و التعليم التى تتفنن الان فى نشر "قلة التربية والجهل" .. نحن فى وضع مختلف و فى أزمة حقيقية و المفروض أنكم تكونوا على قدر المسؤولية و ان يكون عندكم الوعى اللازم للتعامل مع الاطفال فى هذا السن لمحو أثار هذه الازمة .. المفروض يكون فيه تأهيل للمدرس و تعليمات صارمة انه يعلم الاطفال تقبل الاخر و سماع رأيه .. المفروض المدرسة تبدأ تشرح للاطفال كيفية التعايش مع الرأى الاخر و فن الاختلاف ..
مش تشغلوا لطفل ابوه مات فى رابعة اغنية "تسلم الايادى" فتقهروه و تقتلوه الف مرة ... ولا مدرس يجبر الاطفال انهم يعملوا اشارة رابعه و يفرض سطوته عليهم والا ضربهم او سقطهم !!!
لو لم نتدارك الموقف من الان فابشروا بمصر مقسمة كالسودان اللى احنا مستغربين دلوقتى هى اتقسمت ازاى ... بص للى بيحصل فى مصر دلوقتى هتعرف السودان اتقسمت ازاى ... حاول تخرج برة طريقة تفكيرك النمطى .. حاول ميبقاش كل هدفك انك تثبت انك صح و انك انت الوحيد اللى بيفهم حاول تفكر ايه اللى هيحصل بكرة لو فضلنا كده .. حاول تفكر مدى الدمار اللى هيحصل بكرة لو لم نتقبل الاخر انهاردة حاول تحس بالناس و بلاش يبقى جلدك تخين
نشرة اخبار مصر لسنة 2013 فى عالم مواز لعالمنا .. عالم نزعت مه الكراهية و الانانية و التسلط و الديكتاتورية ..
بسم الله الرحمن الرحيم نبدأ نشرتنا لليوم الفلانى من الشهر العلانى لسنة 2013 و نبدأها بالاخبار المحلية - بدء التحقيق فورا مع محافظ القاهرة فيما نسب اليه فى شبهة اهدار المال العام فى الاعمال الاخيرة لتجميل محافظة القاهرة بعد اخلاله بالموازنة المقررة له و قدرها مليار جنيه و التى تم الموافقة عليها بناءا على الدراسات المقدمة من المحافظة .. و الجدير بالذكر ان المحافظ قد اخل بهذه الموازنة بعد ان انفق مليار و 50 الف جنيه اى بزيادة قدرها 50 الف جنيه عن المقرر له . - التحقيق مع وزير التموين بعد شكاوى بعض المواطنين من غلاء بعض السلع الاساسية كالسكر الذى قد شهد زيادة طفيفة فى الايام الماضية و من المقرر ان يمثل الوزير امام جهات التحقيق اليوم . - فى اخر استطلاعات للمركز القومى للبحوث بالتعاون مع بعض مراكز الاستطلاع الخاصة : الامية تتضائل الى 2% و البطالة الى 1,5 % .. و فى اخر بحث لحساب متوسط دخل الفرد فى مصر فقد بلغ 10 الاف جنيه متوسط دخل الفرد العادى شهريا. - ازدياد واضح للافواج السياحية لمصر و غرفة السياحة تصرح الحجوزات 100% لمدة 6 اشهر قادمة . - المجلس العسكرى يعلن ان مصانعه الحربية قد انتجت دفعة جديدة من الطائرات المقاتلة "مصر16" و التى تعد من اقوى الطائرات المقاتلة فى العالم .. و البدء فى انتاج دفعات جديدة من الدبابات الثقيلة و المتوسطة .. - رئيس الجمهورية يجتمع مع قادة الاحزاب المعارضة للاستماع لارائهم بعد انتقادهم له فى قرارته الاخيرة بخصوص العلاوات للعاملين بالقطاع العام .. و قد انتقد قادة المعارضة ان قرار العلاوات قد شمل فئة بعينها و انه كان يجب ان يشمل القطاعان العام و الخااص.
الاخبار العالمية ..
- غرق سفينة اوروبية جديدة كانت تقل مهاجرين غير شرعيين من ايطاليا الى مصر و قد ساعدت القوات البحرية المصرية فى انقاذ الغرقى .. و تعتبر هذه السفينة الثالثة التى تغرق فى اقل من شهرين فى المحاولات المتتالية للهرب من اوروبا الى مصر سعيا وراء حياة افضل فى مصر. - تواصل الاحتجاجات و المظاهرات المناهضة للرئيس الامريكى اوباما لليوم الخامس عشر على التوالى .. و اوباما يصرح "اما انا و اما الفوضى " . - تواصل انهيار الدولار الامريكى امام الجنيه المصرى ليصل الى ادنى مستوياته .. و قد بلغ سعر الدولار اليوم خمس و سبعون قرشا. و من اهم الانباء الرياضية : - تستعد مصر لاستضافة كأس العالم لسنة 2016 و يتجه اليها انظار العالم باشتياق . - خسارة الزمالك مجددا امام الاهلى 4-1 .. :D بغض النظر عن خبر الزمالك ... بس بجد نفسى فى يوم اسمع نشرة الاخبار دى فى التلفيزيون .. بس متكونش "لميس الحديدى" هى اللى بتقولها :D
هى دى الثورة اللى فرحانين بيها ؟؟ الثورة اللى ضيعت البلد و خلت مبقاش فيه اخلاق و لا قيم و لا اى حاجة .. ثورة البلطجية و الصيع ...
شبعنا من الكلام ده مع كل مصيبة بتحصل فى البلد و لغاية دلوقتى ... و دلوقتى بيستخدمه توفيق عكاشة و امثاله لتشويه صورة 25 يناير تماما فى عيون الناس ... انا بس عاوز اسأل هل الثورة نادت مثلا بالسرقة و التثبيت؟؟ الثورة اساسا طلعت ضد السرقة و البلطجة هل نادت الثورة بالقتل؟؟ شعارات الثورة كانت سلمية فى الاساس!!
طب ايه اللى حصل؟؟؟ اللى حصل ببساطة ان الثورة جت فكت قيودك و حررتك من الخوف اللى كان مترسب جواك لمدة 30 سنة ... و لما اتحررت كان قدامك طريقين .. اما تبدأ بشرف و تستغل حريتك الجديدة فى البناء .. و اما ان نستخدم اسلوب الفهلوة اللى للاسف اصبح عادة مرسخة عند المصريين ...
يكون عندك عمارة و تلاقى الدنيا مشغولة بالاحداث تروح تجرى تعلى كام دور و محدش بيسأل فى الزحمة و تلف ضهرك تشتم فى الثورة اللى موتت الضمير من عند الناس !! تحط ايدك على ارض زراعية ملك الدولة و تبدأ تحاوطها بسور و تبنى بسرعة و محدش واخد باله فى الهيصة اللى موجودة و تلف تشتم فى الثورة اللى زودت السرقة !!
تروح تأجر بلطجى ينتقملك من حد كان مضايقك و لا يثبتلك واحد زعلان منه و تلف تشتم فى الثورة اللى افقدتنا الامن و الامان !!
تخرج مع اصحابك تعاكس بنات الناس و تعتدى عليهم و تتحرش بيهم و تلف تتهم الثورة انها عاوزة تخللى البلد منحلة و ان الحرية المزعومة من الثورة جايبة معاها الفساد الاخلاقى ...
للاسف اكتر ناس بتشتم فى الثورة هم اكتر ناس فرضوا بلطجتهم و استفادوا منها ... و ده نوع من انواع ترييح الضمير بصورة غير مباشرة علشان يقول مش انا لوحدى اللى بعمل دى ثورة بنت ستين كلب هى اللى عملت كده !!!
اشتم فى الثوار الصبح علشان التصعيد اللى ملوش لازمة و اننا نفسنا نستقر و لما الاقيهم كسبوا معركة اسقفلهم بالليل و اقول والله رجالة ... و ارجع تانى يوم اشتمهم و اقول كفاية بقى كده مش مصدق نفسك اننا ممكن نوصل لاكتر من اللى وصلناله لانك مكنتش اصلا تحلم يوم اننا نسقط النظام ..
الثورة مكانتش فاسدة بس للاسف احنا اللى فاسدين ...
الثورة نقية لكنها للاسف جائت الينا فى زمن السبكى و محمد رمضان.. فى زمن المصالح و الفساد و العرى ... فى زمن اللى يبيع ابوه يبقى فهلوى و الناس تسقفله .. فى زمن الفنانة فيه تتناسب شهرتها و نجاحها عكسيا مع طول فستانها ...
الثورة بريئة منى و منك و من كل واحد غلب مصلحته على مصلحة البلد فى يوم من الايام ... الثورة بريئة من اللى تاجروا بيها و اللى تاجروا حتى بدينهم علشان يكسبوا من وراها ...
الثورة كانت بنت عذراء اغتصبها الجميع بلا رحمة للاسف و اعتدوا عليها ...
الثورة كانت ضعيفة قدام فساد مستشرى حتى جوة نفوس الناس من غير ما ياخدوا بالهم ... فساد دولة مبارك كان مركب سرطانى خبيث خفى داخل جوانا جميعا من غير ما نلاحظ و بيتوغل و بيقتل كل ذرة ضمير و نخوة و كرامة جوانا ... التدوينة دى مش دعوة للتشاؤم .. التدوينة دى اعتبرها قلم بيضربك على وشك يفوقك من الفساد اللى انت فيه .. اعتبرها قلم بيفوقك من وهم الانسان العاقل الواعى المحارب للفساد اللى انت عايش فيه ..
احنا كلنا فاسدين ... و كلنا رضعنا من دولة مبارك سرطان فساده و شربناه و للاسف فرحنا بيه .. من اول اصغر موظف بياخد 5 جنيه رشوة لغاية اكبر فاسد بيسرق مليارات ... الثورة مش بنت ستين كلب زى ما بنشتمها ... الثورة شريفة بس وقعت فى ايد ناس فاسدة ... افسدوا على مصر اسعد اوقاتها و خلوها تركع قدام طغيان الفساد ...
كلنا متهمين يا سادة لا استثنى احدا و لا نفسى ... كلنا يجب ان نجلس فى قفص الاتهام فى جريمة هتك عرض ثورة بريئة ادت الى مقتلها ... و المتهم الاول فيها هى نفوسنا الضعيفة و فهلوتنا الكدابة ..
اللى ينكر ان #مصر فيها تفرقة عنصرية و اننا فعلا بقينا شعب عنصرى جداا يبقى بيدفن راسه فى الرمل ... العنصرية موجودة فى كل حتة حوالينا ...
و احنا للاسف اللى بننكر ده و بندعى شرف لا نملكه و هو اننا شعب يحب بعضه ... رغم انك تلاقى المسلمين بيسلموا على الاقباط و يتعاملوا معاهم عادى و الاقباط كذلك مع المسلمين و اول ما تحصل مشكلة .. الاتنين بدون تفاهم بيولعوا فى بيوت بعض و يقتلوا بعض ..العنصرية موجودة ضد الفقراء و الناس البسيطة لو انت موظف و جالك ابن حد مهم حتى لو انت مش عاوز خدمة من ابوه و لا حتى هتقابله بس هتفضله فى المعاملة و الاولوية عن الناس العادية ... العنصرية موجودة ضد الباعة الجائلين و الناس الغلابة ... دى موجودة حتى بين سواقين الميكروباص و سواقين التوكتوك ..
العنصرية موجودة عند الداخلية و تكبرهم على عامة الشعب و طالما مش ابن مسؤول او عنده فى العائلة حد مهم يبقى شخص مستباح للاهانة حتى بدون سبب ..
العنصرية موجودة فينا ضد بعضنا .. اتفرج بس على اى خناقة بين اتنين عاديين هتلاقى اول كلمة طلعت "انت مش عارف انت بتكلم مين" العنصرية ابتدت دلوقتى و بوحشية ضد اى حد ملتحى او ست منقبة بحجة انه تبع الاخوان حتى لو كان ملوش فى السياسة اصلا او حتى كان ضد مرسى..
احنا بقينا بنفرح باهانة اى حد مختلف معانا و بسقف للاهانة و بنتهم الجميع انهم غير حياديين رغم اانا كلنا غير حياديين ..
العنصرية عندنا و بقت واقع بنعيش بيه و للاسف بنعلمه لاطفالنا بطريقة كبيرة جدا ..حتى لو مبنعلموش لولادنا مباشرة فبنعلمهم من خلال مشاهدتنا و احنا بنتعامل مع الناس .. القادم للاسف اسوأ بكتير .. احنا دلوقتى خلقنا جيل من الاطفال ساخطين على بعض .. علمناهم يكرهوا بعض قبل ما يعرفوا يعنى ايه كره .. احنا طلعنا اطفال بقت بتكره جيش و شرطة بلدهم و بيشجعوا الارهاب ضدهم ..
طلعنا اطفال بقت بتكره الاسلاميين و الشيوخ و بتشتمهم .. طلعنا اطفال بقت بتكره المجتمع و البلد و العيشة و اللى عايشنها... و بدل ما نطلعهم نحكيلهم على امجاد اجدادنا و حرب 73 و قوة و بأس الجيش المصرى بقينا بنشكك فى تاريخنا و نكرههم فيه ..
طلعنا اطفالنا مبيحترموش الكبير و بيشتموه لمجرد انه مختلف معاهم و سقفنالهم على كده..
للاسف دخلنا اطفالنا لعبه قذرة ... احنا نفسنا كرهناها احنا عملنا لاسرائيل اللى كانت ممكن تدفع مليارات و متقدرش تعمله ... طلعنالهم جيل مشوه الافكار للاسف ...
و فعلا ربنا يستر على الجيل القادم ده ... لاننا لو فضلنا على كده ... هنكون احنا اللى مسؤولين عن اى جريمة هتحصل مستقبلا و هنكون احنا السبب الحقيقي فيها :(
فى وسط روتينك اليومى سواء كنت فى البيت او فى الشغل او مع اصحابك .. بتاكل او حتى نايم ... فجأة يرن هاتفك الجوال برقم غريب لا تعرفه فترد ..
- الو .. - السلام عليكم - و عليكم السلام .. مين؟ - حضرتك استاذ : (اسمك بالكامل) - ايوة انا مين حضرتك - والله انا اخو جمال السواق - مين جمال السواق؟؟؟ - هو حضرتك ممكن متفتكروش بس هو يعرفك كويس اوى و بيشكر فى حضرتك جامد .. هو اشتغل مع حضرتك بس يمكن انت مش واخد بالك منه .. - طيب خير ؟؟ - والله انا هقول لحضرتك على الموضوع .. احنا ناس فلاحين عندنا حتة ارض كده كنا بنحفر فيها علشان نركب طرمبة ميه بس طلعلنا منها خير كتير .. تقريبا 25 كيلو دهب اثرى .. المهم احنا مش عارفين نعمل ايه و نصرفه ازاى !! فجمال اخويا قال مفيش غير الاستاذ (اسمك بالكامل) هو اللى يقدر يصرفهولنا و انه راجل امين و مش هيخمنا و يبقى الموضوع بينا بالنص و انت تستفيد و احنا برضو نستفيد. حضرتك لو مش مصدق تعالى شوف الحاجة بنفسك و احكم .. "و شوية كلام يطمنك بيه و يحسسك ان انت اللى هتجيبله التايهه و ان هو غلبان مبيعرفش يتصرف و انت المنقذ و يعيشك فى وهم الملايين " المكالمة دى ممكن تجيلك لو انت جوة مصر او برة مصر لو جوة مصر و قررت تروح القرية اللى وصفهالك علشان تشوف الحاجة .. هتروح برجليك انت وواحد صاحبك مثلا علشان تتثبتوا و يتاخد كل اللى معاك و موبايلك و عربيتك لو معاك عربية . هتدخل قرية هتلاقى الناس كلها بيبصولك و هيجى اتنين رجالة ياخدوك على اساس انهم هيوروك الحاجة .. هتلاقيهم واخدينك فى حتة واسعة فيها ما لا يقل عن 10 رجالة واقفينلك بالاسلحة بيقولولك طلع كل اللى معاك .. لو حضرتك مسافر برة مصر بتشتغل فى السعودية مثلا هتجيلك نفس المكالمة بنفس التفاصيل و طبعا انت مش هتقدر تروح فهتبعت اخوك او صاحبك .. لما يروح هتجيلك مكالمة تانى تقولك اخوك عندنا ادفع مبلغ كذا علشان نسيبه .. ما انت عاملهم بقى فى السعودية و على قلبك قد كده .. اللى انا قلته ده كله مش قصة فيلم .. و لا خيال علمى .. دى حقيقه بتحصل فى مصر للاسف .. و القرية اللى بتكلم عنها دى فى بنى سويف .. و المكالمة دى بقت اشهر مكالمة نصب منتشرة فى مصر .. انا استقبلت المكالمة دى بالظبط زى ما حكيتها و قفلت معاه و فضلت افكر هيكسب ايه لما يعمل كده و كتبت الموضوع على الفيس بوك عندى فلقيت واحد من اصدقائى بيقوللى انه صدقهم و راح و اتثبت هو وصاحبه اللى كان معاه و اضربوا و انهم تقريبا كانوا هيموتوا هناك .
طبعا برغم كل البلاغات اللى اتعملت الا ان الموضوع زى ما هو .. وواحد صاحبى فى السعودية لسة من يومين مستقبل نفس المكالمة !!
حاول تنشر الموضوع و حاول لما تجيلك اى مكالمة من النوع ده تفكر كويس قبل ما تتوهم بالفلوس اللى ممكن تجيلك و الطعم اللى بيرموهولك .. و ربنا يستر علينا ...
فى مصر فقط ... عاوز تقنع الناس باى فكرة او اى حاجة علشان يطلعلك من وراها سبوبة و مصلحة اربطها بالدين ... و اقعد احلف ان كان فيه واحد ضد الفكرة دى زمان و كان جزاءه ان جاله شلل الاطفال و عياله معرفوش يوصلوا لامهم علشان كانت البلاعة مسدودة .. و ان فيه 3 اقتنعوا بالفكرة فسبحان الله فى ظرف اسبوع اصبحوا رؤساء مجلس ادارة و مليونيرات و الناس بتشاور عليهم فى الشارع ..
و فقط فى مصر ايضا عاوز تشوه اى فكرة او مشروع اربطه بالجنس و بالرزيلة .. زى مثلا ان تقول "اليبرالية هى ان امك تقلع الحجاب" و "اختك تمشى عريانة فى الشارع" و تجيب فيديو لواحد **** بيقول انه يقبل ان اخته تمارس الجنس من غير جواز عادى و ان تحاول تشويه الفكر المنافس لك باللعب على وتر الشهامة المصرية المعروفة و تقول "هم عاوزينا نبقى كده" ..
انا واحد من الناس عاوز اخد الكويس من الفكر الليبرالى و اللى لا يتنافى مع الدين و هو قيادة الدولة باسلوب علمى .. يعنى بناءا على الكفاءة ..
لما اكون عاوز ابنى عمارة هروح اجيب مهندس متعلم يصممها مش هجيب واحد مبيفهمش حاجة فى الهندسة بس مربى دقنه و اقول ده شيخ و بركة و هو اللى هيبنيلى العمارة ... و لما اكون عاوز اعمل برنامج كمبيوتر هروح لمبرمج محترف مش هروح لشيخ حافظ القرأن بس عمره ما استخدم الكمبيوتر فى حياته ... لان ربنا قال ناخد بالاسباب و الاسلام مبنى على "اقرأ" يعنى اتعلم .. و فى نفس الوقت عاوز اخد من الاسلام سماحته و ليس الفكر المتشدد الذى يروجه البعض "لا إكراه في الدين قد تبين الرشد من الغي " .. "ادع إلى سبيل ربك بالحكمة والموعظة الحسنة" .. " اذهبا إلى فرعون إنه طغى فقولا له قولا لينا لعله يتذكر أو يخشى".. يبقى ايه المانع ان تكون الدولة علمية فيها حرية و يقودها اصحاب الكفاءة و مبنية على اساس اسلامى صحيح ؟؟
ليه عاوزين تحطونا فى خانة ان الاسلام هو جماعة سياسية معينة ؟؟ ليه عاوزين يحتكروا الاسلام على نفسهم ليه عاوزينا دايما نكون فى وضع المدافع عن الاسلام لما يعملوا حاجة غلط؟؟ و نفضل نقول الاسلام مش كده؟ ببساطة الاسلام مش جماعة و لا حزب و لا تيار و لا اشخاص .. الاسلام اصلا دين ربنا مش دين بشر علشان يشوهه بنى ادم.. كل واحد مسؤول عن اخطاؤه لوحده حتى لو كان بدقن ..
و الليبرالية مش معناها امك تقلع الحجاب.. الليبرالية معناها ان امك تقلع الحجاب لو هى مقتنعه بكده و تلبسه برضو لو هى مقتنعه بكده و اللى يحاسبها على كده ربنا مش بنى أدم .. محدش يقدر يفرض حاجة على حد "كل واحد متعلق من عرقوبه" زى ما بيقولوا .. و كل اللى تقدر تقدمه لشخص اخر النصح فقط و ليس الاجبار على شىء ...
لو الليبرالية معناها ان يكون عندنا قادة على قدر عالى من العلم و من حملة الماجستير و الدكتوراه و اصحاب رؤية و خطط علمية كل واحد فى مجاله و عندهم خطة واضحة لتغيير البلد للافضل وعلاج المشاكل المذمنة فى الدولة زى "الاسكان"و "النقل"و "الاقتصاد" ... و بالتالى لتحسين صورة المسلمين و الاسلام فأهلا بالليبرالية مع الاحتفاظ بقيم الاسلام الوسطية المتسامحة .. و اذا كان تيار الاسلام السياسى سيقدم نفس الخطط فاهلا به ايضا .. اما ان نقيد فكرنا فى شخص او مجموعه و نقول انها تمثل الاسلام و هى اصلا لا تعمل بتعاليمه و ان نوكل الامور لغير اهلها و لغير المتخصصين فقط لانهم اصحاب دقون لا اصحاب علم و خبرة فهذا هراء ..
سؤال اخير قبل ان تشتمنى ايها القارىء العزيز .. اذا اصابك لا قدر الله مرض فى القلب يستوجب عملية قلب مفتوح هل ستذهب الى دكتور متمكن و متمرس و ذو شهرة و ابحاث و شهادات فى هذا المجال ام انك ستكتفى بالتوجه لشيخ الجامع الحافظ للقرأن ولا يعرف عن الطب شىء؟؟ اذا كانت اجابتك هى الذهاب للدكتور فهذا هو الاسلام الحقيقى و هو اعطاء الامر لاهله من ذوى الكفاءة و الخبرة و العلم بغض النظر عن الى اى طرف ينتمون.. اما الشيوخ و حفظة القرأن فهم اعلى و اكبرمن ذلك لان وظيفتهم الحقيقية هى تعليم الناس دينهم الصحيح و الدعوة الى الاسلام و هى مهمة اثقل و اهم بكثير من العمل السياسى .. "خيركم من تعلم القرأن و علمه" ..
و متخافش يا عم و الله امك و امى و امهات المصريين كلهم محترمات مش هيقلعوا الحجاب لو حد قلهم كده بالعكس ده ممكن لو حد قالهم كده يقلعوله عينه ..
للاسف الناس كلها الان بعد الحادث مقسومة نصين ... نص بيبرر كل حاجة للرئيس و بيحاول يبين انه ملوش ذنب فى اى حاجة و ان فى جهات تانية هى اللى دبرت الحادث. و نص مش سايب اى حاجة مبيتلككش بيها للرئيس و بيزيدوا الهجوم عليه لتحقيق مكاسب سياسية خاصة.. كله بيفكر فى مصلحته و مصلحة حزبه او جماعته و محدش بيفكر فى احساس أم فقدت ابنها و ضاع املها فى الحياة .. محدش بيفكر فى شخص كان سليم معافى و ركب القطر فنجى من الموت و لكن بعاهة ستصاحبه بقية عمره .. هناك من فقد يده او رجله و اصبح عاجزا .. هناك من فقدوا عائلهم الوحيد .. هناك من فقدت زوجها .. هناك أطفال فقدوا ابائهم. الخاسر الحقيقى هم الناس الغلابة الذين لا يملكون من هذه الدنيا اى متعة غير انهم مجتمعين مع من يحبون مع ابنائهم و ازواجهم و حتى هذه اخذناها منهم بالاهمال و الفوضى فماذا تبقى لهم من هذه الحياة ؟؟!! تبقى لهم الالم و الحسرة و الفقر و العذاب و الظلم
الا نستطيع أن نقول كلمة حق للرئيس اذا اصاب أحسنت جزاك الله خيرا اكمل فانت على طريق الصواب واذا اخطأ لقد اخطأت فاعتذر وصحح اخطائك و تحمل المسؤولية؟
"لقد سأل عمر اصحابه ماذا تفعلون بى ان اعوججت فقال احدهم قومناك بالسيف فقال عمر الحمد لله ان جعلت فى امة محمد من يقومنى بالسيف".. دى مش الحادثة الاولى فى عهد مرسى و لم نرى قرار واضح او خطة علمية لعدم تكرار الحوادث السابقة ..
اذا فليتحمل الرئيس مرسى المسؤولية كاملة و يتحمل معه هشام قنديل ووزير النقل و رئيس هيئة السكة الحديد الى ان تصل الى مسؤولى الصيانة المهملين و السائق اذا اخطأ كل هؤلاء مهملين و يجب محاسبتهم حتى لا تتكرر المذبحة .. بخلاف ذلك فهو عبث واذا كان كبش الفداء مثل المرات السابقة سيكون فقط سائق القطار او اصغر مهندس يحمله رؤسائه المسؤولية فأبشروا بالهلاك
فقد قال رسول الله صل الله عليه وسلم "إنما أهلك الذين من قبلكم أنهم كانوا إذا سرق فيهم الشريف تركوه ،وإذا سرق فيهم الضعيف أقاموا عليه الحد ،وأيم الله ،لو أن فاطمة بنت محمد سرقت لقطعت يدها"
هذا الحديث عبارة عن قانون فوق دستورى يصلح لكل وقت و هو قمة العدل .. لا يتحدث فقط عن السرقة و انما هى مثال و لكنه يتحدث عن الاهمال و القتل و الظلم و كل ما يضر الوطن و ينشر الفوضى ..
المذنب يجب ان يعاقب مهما بلغت مكانته او صلته بخلاف هذا لن تنهض مصر و لن نرى اى مشروع حقيقى للنهضة .. فاما ان تكون فعلا محاسبة للجميع و عقوبة عامة تصل الى رئيس الجمهورية و تعاقبه على تقصيره فى اتخاذ قرار او عمل خطة ناجحة ناجزة على اساس علمى للحد من مثل هذه الحوادث خاصة و انها ليست المرة الاولى .. و اما ان نستيقظ يوميا على حادث مماثل يبرر فيه المبررون تقصير الرئيس و يهاجم فيه المهاجمون ليثبتوا فشل الرئيس ..
و بين مؤيد و معارض يضيع حق الضعيف و يتوه العدل و يسود الظلم
رحم الله شهداء الحادث و تغمد ذويهم بالصبر و السلوان و انقذ مصر و المصريين من الفوضىو الاهمال توقيع : محمود عبد الحفيظ صعيدى من مصر
باسم سوستة - ابراهيم عيسى ابو حمالات - خالد جرجس عبد الله - الخرفان - العلمانيين - الكفار - ابو اسماعيل ابن الامريكية - مرشد الخرفان - البردعة - حمضين ... الخ هذه ليست اسماء شخصيات كارتونية و ليست ألقاب يتنابذ بها الاطفال للاسف هذه هى الحال التى وصلنا لها فى مصر الان بسبب اختلاف الاراء فقط !! كل من سبقوا و اكثر و القائمة كبيرة كانوا متوحدين متفقين على اطاحة نظام مبارك و كانوا اخوة و اشقاء على استعداد ان يضحوا بحياتهم من اجل بعض حتى لاحت فى الافق علامات النصر فاصبح هذا حالهم من اجل تقسيم الغنائم .. فتجد من كان رفيق الميدان بالامس و كان يقتسم رغيفه معك فى شدة الجوع و تقتسم غطائك معه فى شدة البرد هو عدو اليوم يتمنى لك الهلاك و تتمنى له الموت!! من اوصلنا الى هذه الحال؟ و من قادنا الى هذه الفرقة؟؟
انها الغنائم الوهمية التى يجرى اليها الجميع .. يقتتلون من اجل الفريسة و تناسوا انها فريسة هزيلة مريضة لا تثمن ولا تغنى من جوع .. فريستهم هى المنصب و الكرسى ففكروا في كل مميزاته و تناسوا كل مسؤولياته امام الله و امام الوطن .. كرس كل فريق جهده لكى يحظى بالمنصب و الكرسى و لم يكرس و لو القليل من هذا الجهد لكى يخدم وطنه من خلال او بدون هذا الكرسى .. تجلس فى مجلس كل فريق و تسمع كلامه فتعتقد انه هو صاحب الحق و ذلك لانه يكرس كل جهده لاصطياد اخطاء الفريق الاخر فقط .. و لهذا تزيد الفرقة .. تستمع الى اعلام كل طرف فتجده على حق لانه يجسد عيوب و اخطاء الطرف الاخر و يتغاضى عن عيوب و اخطاء فريقه .. و لهذا يزداد الصف انشقاقا و يزداد الوضع خطورة مما ينذر بحرب اهلية وشيكة و العياذ بالله !! هل دور الاعلام فعلا مؤثر الى هذه الدرجة؟؟ منذ فترة كنت اتناقش مع بعض الاصدقاء حول الفيس بوك و فوائده و اضراره و كنت اقول لهم انه من الملاحظات التى لاحظتها و التى تبدوا خطيرة بقدر نعومتها هى انك يمكنك ان تكون صداقة مع اشخاص لم ترهم فى حياتك و تكون لهم صورة فى خيالك و غالبا ما تكون صورة كاذبة تماما عن حقيقتهم لان الصورة التى كونتها معتمدة فى الاساس على كلماتهم الرقيقة على الفيس بوك و عباراتهم المقتبسة من هنا و هناك .. الصورة التى كونتها عن اصدقائك الذين لم تراهم عينيك غالبا ما تكون "كوبى و بيست" من اصدقاء لهم او من صفحات اخرى اقتبسوها او نقلوها و تكون منافية لحقيقتهم لتصطدم بالواقع اذا قابلت هؤلاء الاشخاص و تعاملت معهم فعليا فتجدهم مخالفين للصورة الوردية التى رسمتها فى خيالك .. هذا بالظبط ما يحدث معنا الان و لكن بالعكس .. اغلبنا اصبح يأخذ اخباره من صفحات الفيس بوك و الميديا و يعتمد عليها فى نقل الاخبار و هى غالبا ما تكون اخبار كاذبة يعلم الله من روجها و من المستفيد منها و تنتشر على صفحات الفيس لتقرأها فيزداد حقدك و كرهك للطرف الاخر و يزداد حنقك بدافع وطنى و هو غيرتك على الوطن حتى و ان صدر تكذيب لاحق لهذه الاخبار فالهدف منها قد تحقق و هو استمرار حالة الكراهية لديك..
هل تعرف ايها الليبرالى كم من اصدقاء عمرك و اقربائك الذين تثق بهم جدا ينتمون الى تيار الاسلام السياسى الذى يزيدك فيه الاعلام كراهية يوما بعد يوم؟؟ هل تعلم ايها الاخوانى كم من جيرانك و زملاء الحياة الذين تعتز جدا بهم و لا ترى للحياة بدونهم معنى ينتمون للتيار الذى تكرهه و يكفره شيوخك و يزيدك الاعلام الذى تتابعه فيهم كراهية ؟؟
هل تعلم يا مصرى كيف يتم دس السم فى العسل حتى تكره شقيق عمرك و زميل كفاحك و اخيك المصرى؟؟ هل تعلم من المستفيد من كل هذا؟؟ بالتأكيد لن تكون انت ولا انا و لا مصر بالتأكيد سيكون اعدائنا .. انت تجلس خلف شاشة جهازك تتلقى ما يريده اشخاصا اخرين يعلم الله من هم ان تتلقاه .. انت تنشر اخبار تساعد فى تدمير الوطن بدافع غيرتك على وطنك و بدون قصد.. منذ متى تم تصنيفنا فى مصر على اساس عرقى او طائفى او سياسى او دينى .. كلنا مصريون نختلف فى الفكر و نتوحد فى حب الوطن .. نختلف فى الدين و نتوحد فى النسب .. نختلف فى الافكار و الاراء و نتوحد جميعا فى حب مصر منذ متى و نحن نمتلك هذه العصبية المميتة و الكره للاخر؟ منذ متى رحبنا بالعنف و الدم؟ منذ متى لم ننكر عدوان مصرى على مصرى اخر ؟ لم تكن الثورة مخطئة فقد كان ثوبها ابيض عندما ظهرت تطالب باحسان المعاملة و تحسين المعيشة .. من لطخ ثوب الثورة بالدم هم اعدائها.. من لطخ ثوب الثورة بالدمهو السعى وراء المصالح الشخصية و الاهواء .. من لطخ ثوب الثورة بالدم هو من نفخ فى النار ليزيدها اشتعالا ليفشل الثورة .. من اوصلنا الى هذا الحال هو من يجلس فى الجانب الاخر خلف شاشات اجهزته يبث السم لنا لنتلقاه بصدر رحب فنزداد فرقة ..
الحل بسيط .. لا تستمع الى طرف و احد فقط .. استمع من الجانبين حتى و ان كنت مؤيد لفريق معين فاستمع من الاخر . لا تقدس اشخاص و تبحث لهم عن مبررات فجميعنا بشر و كل ابن أدم خطاء .. أيد فكرة و استمع الى الافكار الاخرى و خذ من كل فكر ما يعجبك و لا تتقيد بفكر معين لا تندفع و تحكم على الاخرين بالخيانة و عدم الوطنية فقط لانهم مختلفين معك فلم يخلقنا الله متساويين ابدا و لن نكون لا تأخذ اخبارك الا من مصادر موثوق منها و لا تنشرها حتى تتأكد لا تكتفى بقراءة ما هو مفيد و ينبذ الفرقة بل حاول نشره أحسن الظن بالناس و لا تتبع نظريات المؤامرة
مصر اليوم تحتاج مننا التجمع و ليس الفرقة اكثر من اى وقت مضى فحاول ان تقف مع مصر الان فهى تحتاج رحابة صدرك لمن يختلف معك اكثر من تعصبك لمن تؤيد ..
وانا بالرغم من تأيدى لفكرة سياسية معينة و معارضتى لاخرى الا ان الله يعلم ان المقصد من وراء كلامى هذا هو الصالح العام و محبة الوطن فقطليس الا .. و ان التجمع حول الوطن الان اهم من اى انتصار سياسى لجماعة او فرقة..
رحمنا الله و حفظ لنا مصر سالمة غانمة ان شاء الله .
مجموعة مؤيدين حول الرئيس و جماعة الاخوان المسلمين يبررون كل الاخطاء و يرفضون حتى الاعتراف بان مصر فى ازمة و يتهمون كل من يشكى همه و يشكى تدهور الاحوال فى مصر بالخيانة فقط لانهم يخافون ان يعترفوا بالازمة فتكتب فى صحيفة فشلهم و للاسف هذا هو ما يمكن ان يعجل بفشلهم فعلا لان اولى خطوات حل الازمة هى الاعتراف بها و اذا كنت لا تعترف بوجودها اصلا فبالتالى لن تحاول حلها ..
المجموعة الثانية فى المشهد هى المعارضة و التى لا تعترف باى نجاح تماما تحققه المجموعة الاولى و بالعكس فانها تحاول ان تثبت فشل الرئيس و جماعته لكى يثبتوا صحة وجهة نظرهم بان الرئيس و جماعته غير قادرين على قيادة البلاد و هو ايضا ما يمكن ان يزيد من الازمة و يدخل البلاد فى صراعات ..
المجموعة الكبيرة من الناس فى المشهد تقف فى المنتصف و هى جموع الشعب التى تريد فقط تحسين احوالها و لا تكترث بهؤلاء ولا هؤلاء و يمكن ان يكونوا مؤيدين للاستقرار فبالتالى هم مع بقاء مرسى فى الحكم و اعطاءه فرصة حتى يشعروا فقط بالاستقرار و لكن اغلبهم غير مؤيد للاخوان كتنظيم .. "من الاخر عاوزين ياكلوا عيش" و هذا يفسر طبعا نتيجة الاستفتاء على الدستور و الذى لم يقرأه احد و لكنهم مشوا بمبدأ "خلينا ورا .... لغاية باب الدار" فى وسط هذا المشهد المعقد تجد مجموعة اخرى قليلة و لكنها قوية و مؤثرة لانها تملك الاموال و التى تسمى بالفلول او بمعنى اخر بقايا النظام السابق و الذى يسعى بكل قوة لاثبات فشل النظام الحالى حتى يترحم الناس على ايام مبارك و هم ناجحين بشكل كبير و دورهم الرئيسى فى المشهد هو اثارة المؤيدين و المعارضة اكثر فاكثر لجرهم الى العنف حتى نرى مزيدا من الفشل و الانفلات و الدماء و هو هدفهم الرئيسى ... هدفهم ان يقودوا مصر الى الهاوية ما هى الحلول العملية للازمة ؟؟ الحل اولا ان نعترف ان الاقتصاد المصرى فعلا متدهور و يسير من سىء الى اسوأ كل يوم و اننا على شفا حفرة الافلاس فعلا .. و حتى من يقول ان الدول لا تفلس اقول له توقع الاسوأ يا اخى و اعمل حسابه افضل من ان تجلس و تفاجىء به .. الحل فى الازمة الحالية هو حل واحد بس ... ان كل الاطراف الثلاثة الاولى ينظروا امامهم فقط الى الهاوية التى يقودنا اليها الطرف الرابع ... طبعا هتقول دلوقتى انى مع نظرية المؤامرة!! لو انت مش شايف ان فيه مؤامرة فعلا يبقى للاسف حضرتك مبتشوفش او بتعمل زى النعامة اللى بتدفن راسها فى الرمل .. المؤامرة موجوده و كلنا متأكدين منها و المستفيد منها معروف .. مؤيدين الرئيس لازم يفهموا ان التأييد الاعمى و البحث عن مبررات لاخطاء نخبتهم ده بيضر الرئيس مش بينفعه و بيعجل بفشله الذى لا اتمناه لانه فى الاخر بيضر مصر مش بينفعها !!
انا غير مؤيد للاخوان و لكنى اتمنى ان ينجح الرئيس الاخوانى فى المرور بمصر من الازمة لانى عاوز مصلحة البلد بغض النظر كانت على يد يمينى او يسارى او اشتراكى او اسلامى او رأسمالى .. انا كل اللى يهمنى ان مصر متغرقش و ان الناس الغلابة تتحسن اوضاعهم .. ميهمنيش مين يحكم انا يهمنى ان اللى يحكم يحكم بالعدل .. الظلم على يد رئيس اسلامى زيه زى الظلم على يد رئيس كافر فى الاخر اسمه ظلم و فى الاخر اللى تضرر منه الشعب ...
نظرية تكفير المعارضة و اتهامهم انهم ضد المشروع الاسلامى لانهم بينتقدوا سياسة الرئيس نظرية فاشلة اول من سينكوى بنار فشلها هو الرئيس نفسه .. و ستضر الدين اكثر ما ستنفعه .. المعارضة وظيفتها ان تعارض و تنتقد و هى تقوم بواجبها على اكمل وجه بل و ازيد من اللازم حتى فلتقم انت بواجبك ايها المؤيد و بدلا من مهاجمة المعارضة حاول تنصح الرئيس وتوجهه و تصلح من الوضع علشان حتى تكبسهم يا اخى و تبين انهم غلطانين ...
البحث الدائم عن طرف غائب نعلق اخطائنا على شماعته سيقودنا فى الاخر الى التهلكة ايضا .. الاعتراف بالخطأ و تقبل نقد المعارضة هو الحل .. الاعتراف بشرعية الرئيس و القبول به حتى نهاية مدته و مساعدته على العبور من الازمة هو الحل.. العمل من اجل انقاذ مصر و ليس اسقاط الطرف الاخر هو الحل .. التوحد من اجل مصلحة البلاد هو الحل .. اما ان يظل الوضع القائم كما هو عليه كل طرف يقف فى جانب يخون الطرف الاخر و يكفره و يعلق اخطاؤه عليه سنتجه الى الهاوية و باقصى سرعة .. هذا هو الوضع الحالى لمصر و من لا يراه فهو بالتأكيد اعمى او بيستعبط توقيع : محمود عبد الحفيظ صعيدى من مصر
هو ايه اللى بيحصل فى مصر و مين مع مين و مين ضد مين؟؟؟
الاجابة على السؤال ده هتكون على مزاج و رغبة اللى هيجاوب عليه ... يعنى لو اللى هيجاوب ليبرالى هيقول انه مع الديموقراطية ضد الديكتاتورية و الفاشية .. و هيقنعك بكلامه
لو اللى هيجاوب علمانى هيقولك انه ضد استخدام الدين و التجارة به و تلويثه فى اللعبة السياسية القذرة و مع فصل الدين عن الحياة السياسية و برضو هيقنعك بكلامه ..
لو اللى بيجاوب بقى من تيار الاسلام السياسى هيقولك انه مع تطبيق شرع الله فى الارض و ضد الكفرة اللى بيحاربوا الدين و طبعا هيقنعك بكلامه ... طيب المواطن المصرى بقى فين من كل ده و يقتنع بمين و مين فيهم الصح؟؟؟
الحقيقة الموقف فى مصر دلوقتى بيفكرنى بالفيلم العبقرى اللى اتعمل زمان "فوزية البرجوازية" هو ده اللى بيحصل فى مصر دلوقتى .. كل تيار سياسى واخد شوية ناس غلابة اقنعهم بفكره و فهمه ان الجبهة التانية اعداء الوطن و لو تفتكروا الفيلم و احداثه هتلاقوا ان هو ده اللى حصل بالظبط لدرجة انهم وصلوا الجيران انهم يتجسسوا على بعض و يضربوا بعض و كله بدافع الشهامة و عدم قبول الحال المايل .. المشكلة اللى بنواجهها دلوقتى هى سفالة من نوع خاص .. كل طرف عنده مصلحة و طمعان فى السلطة بدل ما يوجه خطاب اصلاحى و يعمل خطة يقول فيها ازاى انا هصلح البلد بيستسهل و يشوه الطرف التانى و يتهمه بالخيانه و ده بيكون اسهل ما هو يشتغل ..
المواطن فى النهاية هو الوحيد الخسران .. الخدمات المقدمة له بتقل و بتتقلص لغاية ما اصبحت لا ترى بالعين المجردة.. الجنيه اللى كان ممكن يوفرله وجبة افطار هو و اولاده زمان اصبح لا شىء و انعدمت قيمته و دخله ثابت لا يزيد .. يعنى الوضع للاسف من سىء لاسوأ و رجال السياسة من الطرفين اللى بالطبع مليونيرات كل همهم انهم يشتموا فى بعض و يخونوا بعض و كأنهم فى وادى و الشعب فى وادى تانى خالص علشان مصالحهم الخاصة ..
طيب و الحل و هنفضل كده لحد امتى؟؟
الحل الوحيد للخروج من المأزق هو مشاهدة النهاية فى فيلم "فوزية البرجوازية" هو ده الحل ... الحل ان الناس تفوق و تعرف ان كل النخبة اللى طالعين ليل نهار فى التلفيزيون و زهقنا منهم سواء من تيار الاسلام السياسى او من المعارضة ليسوا الا طالبين سلطة وجاه و مش فارق معاهم المواطن البسيط و احلامه تماما .. الحل اننا بجد نقاطعهم و نقاطع تصريحاتهم و نخليهم لوحدهم فى واديهم يشبعوا به و نخلينا احنا فى وادينا اللى هو امر واقع عايشينه نصلحه و نغيره لاننا لو استنيناهم مش هيعملولنا حاجة.. احنا عمرنا ما سمعنا عن حد بيدعوا للالحاد فى الشارع و لا للزنا و العياذ بالله و شرب الخمر و الرزيلة يعنى الحديث عن تيار اذا مسك هيعمل كده عبارة عن هراء و ابتزاز لشهامة المصريين لتحقيق مصالح شخصية لان لو حد دعى لكده اساسا الشعب مش هيسكتله و على النقيض احنا مش محتاجين حد طول ما احنا ماشيين يكفرنا ولا يمسكلنا عصايا فى الشارع و يقول للستات يتغطوا و برضو محدش فينا هيقبل ده و كل ده اصلا مش هيحللنا مشاكلنا ده هيزودها .. احنا عاوزين حد يوفرلنا العيشة الكريمة عاوزين حد يوفرلنا فرص عمل عاوزين ولادنا ما يطفشوش برة البلد عاوزين نستر بناتنا و نجوزهم عاوزين نربى اطفالنا ونعلمهم ..
كل اللى مشغولة فيه النخبة الفاسدة ده ميهمناش .. يعنى ايه تتخانقوا على شكل الدولة و انتوا مين اصلا علشان تغيروا شكلها؟؟ هى مصر هتفضل مصر حتى لو مين اللى مسكها انتوا نسيتوا اننا مر علينا اتراك و فرنساويين و انجليز و يهود و بلاء ازرق و محدش عرف يغير مصر و معالمها بالعكس هم اللى اتغيروا و رجعوا بلادهم حاجة تانية ... عاوزين الحل يا شعب مصر فى اللى احنا فيه ده؟؟ الحل هو الوحدة تانى و نبذ الخلاف و نفهم اننا للاسف بيتلعب بينا من نخبة فاسده كل هدفها مصلحتها هى بس .. عاوزين الحل يا شعب مصر؟ الحل فى مشهد النهاية فى الفيلم و اللى لازم نكتبه بسرعه و ننفذه لان المشهد طول اوى و بقى ماسخ و كل ما بيطول اكتر النهاية بتتعقد و بتبعد اكتر ...
اكتبوا مشهد النهاية لهذا الفيلم الساقط الذى نعيشه اثابكم الله ..
دايما مبنفتكرش المصريين فى الخارج غير لما يكون عندنا مشكلة اقتصادية و عاوزينهم يحولوا فلوسهم و يحلولنا المشكلة .. و كأن المصريين فى الخارج عبارة عن حصالة بنرمى فيها الفلوس الفضة و اول ما نتزنق نجرى عليها علشان تحللنا ازمة..
ممكن اسأل حضرتك سؤال؟؟ تعرف ايه عن المصريين اللى برة غير انهم مكنة فلوس لما تحتجها تدوس عليها تنزلك دولارات؟؟
تعرف ايه عن احساس أب اتحرم انه يشوف ابنه او بنته بيكبروا قدام عينيه علشان يوفرلهم لقمة عيش مش لاقيها فى بلده؟؟ تعرف ايه عن احساس شخص كل علاقته باولاده حكاوى بتحكيهاله مراته لما بينزل كل سنة عن اللحظات اللى اى بنى أدم فى الدنيا بيحلم انه يعيشها انه يشوف اولاده بيكبروا قدامه؟؟ تعرف ايه عن احساس شخص لما بينزل بكل لهفة بعد غيبة طويلة علشان ياخد ولاده فى حضنه يجروا منه يستخبوا ورا امهم علشان خايفين منه لانهم مش عارفينه؟ تعرف ايه عن احساس شخص كل علاقته بمراته مكالمة تليفون او شات على الانترنت و لما ينزلها كل سنة ولا سنتين بيبقوا مكسوفين كأنهم لسة بيتعرفوا على بعض؟؟ طيب تعرف ايه عن احساسه و انت بتهاجمه لما يقول رأيه فى احداث البلد على النت و تقوله انت ايه اللى دخلك انت برة مصر مش شايف حاجة؟؟ و كأنك بتتهمه بالخيانه مثلا لمجرد سفره علشان لقمة العيش اللى مش لقيها فى بلده !!
طيب تعرف ايه عن احساسه و هو برة البلد و عمال يسمع منك عن الانفلات الامنى و حوادث الخطف و الاغتصاب و السرقة و القتل وهو سايب مراته و عياله فى مصر لوحدهم؟؟!! طيب تعرف ايه عن احساسه و هو بيتهان برة من ناس غريبة و ابسط كلمة ممكن يسمعها لو اتظلم و طالب بحقه هى "لو كنت لقيت تاكل فى بلدك مكنتش جيت هنا يبقى تشتغل وانت ساكت" ؟؟ طيب تعرف ايه عن احساسه و هو رايح السفارة المصرية يستنجد بالمصريين اللى هناك على امل انه يلاقى حد يرفع عنه الظلم فيلاقيهم بيقولوله ملناش دعوة بيك ؟؟ طيب تعرف ايه عن احساسه و هو راجع مكسور مطاطى راسه للى ظلمه بعد ما سفارة بلده خذلته و الظالم بيبصله بانتصار؟؟ طيب تعرف ايه عن احساسه بعد ده كله لما برضو بيدوس على كرامته و يشتغل علشان يوفر لولاده حياة كويسة مش هيعرف يوفرهالهم لو رجع مصر؟؟ طيب تعرف ايه عن احساسه لما ولاده يكبروا شوية و يلاقيهم بيتصلوا بيه يفرح و يرد عليهم بلهفة يلاقى كل المكالمة محتواها انهم محتاجين فلوس و كأنه بالنسبة لولاده اصبح بس عبارة عن مكنة فلوس ليس الا؟ طيب بلاش كل ده ممكن اسأل مصر بعد الثورة عملت ايه للمصريين فى الخارج علشان يحسوا انهم مصريين؟؟ هل ساعدتهم الدولة بحاجة؟؟ هل حتى تم تغيير و اعادة تطوير نظام السفارات و القنصليات برة علشان نساعدهم؟؟ انت عارف الفلبين الدولة الفقيرة اللى بنتريق عليها علشان اغلبهم بيشتغلوا خدامين و سواقين و كده عاملة ايه لرعاياها برة؟؟ الفلبين عملت التوظيف برة عن طريق مكاتب مرخصة من الدولة و اى حد يخرج برة الفلبين يشتغل لازم يكون عن طريق المكاتب دى و المكاتب دى هى اللى بتتعاقد مع الشركات فى الدول الاجنبية او مع الكفيل فى دول الخليج و لو حصلت اى مشكلة مع اى مواطن و كفيله او شركته بيروح السفارة و السفارة على طول بتتصل بالمكتب اللى متعاقد مع الشركة دى و لو ثبت ان الشركة او الكفيل مش بيدى للعامل مستحاقته السفارة بترجع العامل على الفلبين و بترفع هى قضايا ضد الشركة دى و بتقفل المكتب المتعاقد معاها فى الفلبين و بتحط الشركة او الكفيل ده فى بلاك ليست ممنوع اى مكتب تانى يتعاقد معاه فى الفلبين او يصدرله عماله و لما بتجيب للعامل مستحاقته بتبعتهمله و هو قاعد معزز مكرم فى بلده !!
احنا بقى عملنا ايه للمصرين فى الخارج؟؟ حاول قبل ما تطلب منهم الدولارات و تريل عليها تحط نفسك بس مكان واحد منهم و فكر هل هو بيلاقى الفلوس فى الشارع زى مانت بتفكر ولا بيدفع تمنها فعلا ؟؟ انت عارف ان المصرى برة مصر و هو راجع بيضطر يبيع سيارته بسعر بخس جدا و بيخسر فيها كتير لانه ميقدرش ينزلها مصر لان الدولة بتطلب منه جمارك قد تمنها مرتين؟؟ يعنى على الاقل مكلفناش خاطرنا و عملناله اعفاء جمركى على سيارته الخاصة فى حين انك بتعفى رجال الاعمال و اصحاب شركات السياحة من الجمارك على سيارتهم؟؟!! يا سيدى خليه يحط فلوس جمارك عربيته وديعه باسمه فى بنك مصر لمده 3 سنين يبقى هو استفاد و البلد برضو استفادت!!
انا على فكرة مش ضد ان المصريين يقفوا مع بلدهم و يحولوا دولارات علشان الاقتصاد بالعكس ده واجب عليهم بغض النظر هم مؤيدين للنظام او ضده لان ده فى النهاية فى مصلحة مصر بس انا برضو ضد انك تاخد منهم و متديلهومش حقهم
و طبعا انا ضد استاخدمهم فى الحرب السياسية الساذجة اللى بتزيد الانقسام و بتسخن المصريين على بعض كل يوم .. يعنى لو فيه مصرى بالخارج غير مؤيد للنظام و انت بتطالبهم بعمل حمله لانقاذ مصر يبقى لما الراجل ده لما يحول فلوس متقولش انه بيحول لانه مؤيد للنظام لا هو بيحول فلوس علشان مصر بغض النظر مؤيد لمين او معارض لمين .. حاول تتعامل مع المصرى فى الخارج على انه مصرى مش مكنة فلوس ... اعتبره ابوك يا اخى !!
